KUDUS – Naliká dinten malem Setu tanggal 25 sasi Dhésèmber 1880, ingkang mentas kapengker, tiyang kaji Ngali, gagriyá ing dhusun Wergu Kulon dhistrik nagari Kudus, dalu puniká kaji Ngali saré ing griyá, sareng wanci jam 2 dalu nglilir saking saré lajeng nganglang dumugi sawingkinging griyá.
Kaget mireng sabawaning tiyang mawi nyuwárá, “Melèk-melèk!,” saèmpèr tiyang jagi rundhá lajeng murugi sarwi mindhik-mindhik. Sareng celak katingalan yèn ingkang nyuwárá melèk-melèk wau inggih sang duratmáká, awit katondhá sampun akaryá babahan sáhá nyanyi canggah tuwin lenterá, boten sarontá lajeng apitaken sápá iku, sang duratmáká sareng wuningá dipunpurugi tiyang lajeng énggal amangsuli, “Aku!”, sarwi nyawat banon kénging jajanipun Ngali, lajeng dhawah.
Boten dangu tangi malih anglawan, ing wekdal puniká ramé sanget udreg-udregan asilih ungkih, gelut akuwel bithi-binithi ngantos kaleresan dintenipun Jumungah énjing kaji wau cukur awit salat Jumungah, sareng raménipun gelut sirahipun kaji Ngali kang katingal menis-menis wau kacokotan ngantos gobrah-gobrah, dalu wau sang pandung karépotan kajengkang…. Boten uwal lajeng kanteman ing ngalu kajeng sirahipun malopor dhawah lajeng pejah, ngènggèn wekdal puniká kaji inggih boten kasupèn cerik-cerik nedhá tulung sáhá binarung ungelipun titir aramé, ananing sadhatengipun párá tandang, sapandung sampun ngemasi.
Katitipriksá katranganipun tiyang kang mandung wau anami katruná Karim sami dhusun ing Wergu Kulon ugi, pancèn sampun werinipun ing dhusun ngriku, sampun kaping tigá kénging ukumanipun nagari dipun krakal jalaran nyolong darebekipun ing tiyang, ananging taksih katingal seneng ing manahipun kadosá mangké kapok. Ingkang dados gumunipun tiyang kathah wau, déné mandung mawi bektá canggah sartá lenterá, kados punika, sareng lumampah dumugi pangggènan pajagèn tiyangipun saré lajeng canggahipun kabektá sartá lenteranipun pisan.
Titi ing Kawitan ping 3 Januwari taun 1881
Katandhan Gumun.