BATANG – Suikerfabriek Kalimati, pabrik gendhis ingkang kalenggahan ing Kalimati (sapuniká Watesalit), naté nyumbang artá kanggé mbiyantu Perang Transvaal utawi Perang Boer ingkang kaping kalih (1899-1902).
Perang Boer inggih puniká perang antawis párá tani Republik Afrika Kidul (Transvaal) sareng kaliyan Oranje Vrijstaat (Nagari Mardiká Oranje, red) kalawan Karajan Inggris.
Perang puniká minongká akibat mungsuhan antawis párá tani lan priyantun Inggris. Komando bálá surádadu tani ngetrapaken taktik gerilya, lajeng surádadu Inggris mbales nganggé taktik bumi hangus. Kejawi makaten Inggris ugi nganggé kamp konsentrasi, saénggá kathah párá tani ingkang pejah.
Sumbangan saking Kalimati wau miyos Komité Wanitá kathahipun 42,10 gulden, lajeng De Besoeki Tabakmaatschappij Jember: 70 gulden, WGD Ponorogo 100 gulden, jumlah kintunan sadèrèngipun 5.445,60 gulden. Total: 5.657,70 gulden.
Kados kaserat ing De Locomotief, dinten Kemis (02-11-1899), dipunaturaken sajangkepipun makaten:
Mawi Damescomité (Komité Wanitá) ing Semarang pikantuk kabar pesti bilih sapuniká dipunbetahaken bantuan medis langkung kathah kanggé mbiyantu sedèrèk-sedèrèk ing Republik Afrika Kidul ingkang taksih perang ageng ngadhepi Inggris.
Sarèhning makaten dipunusulaken supados cancut taliwándá mbiyantu, sebagéan mawi ngintun langsung piranti perban, sebagéan malih mawi Nederlandsche Rode Kruis (Palang Abrit Walandi, red).
Pramilá dipunbetahaken artá ingkang kathah. Párá wargi Walandi sáhá sedèrèk Transvaal ing Indië (Indonesia), tanpá raos mungsuhan dateng negari lan pamréntah Inggris, ngaturi pirsá panjenengan sisahipun kahanan ingkang dipunadhepi párá sedèrèk Transvaal, lajeng ngaturi panjenengan kanthi temen saénggal-énggalipun, wekdalipun sampun mèpèt, supados ngintun bantuan dateng alamat kados kaserat makaten:
Mevr. Pleyte-De Roo, presidente (pangarsá), De Bruyn-Engelbrecht, secretaresse (sekretaris), v. Suchtelen-Thierbach, penningmeesteres (bendahara), Verspyck-Sythoff, Trousset-Hoon, Soesman-Van Heel, Van Buizen-Romeny, Dunlop-Hen Van Rijnberk, lntveld-Bekking, Soeters-Van Deventer, Houthuysen-Merkenstein, Brooshooft-Einthoven.
Ugi dateng administrasi De Locomotief panjenengan saget ngintun bantuan kanggé Transvaal. Artá ingkang dipuntampi miyos Komité Wanitá sáhá miyos De Locomotief mangké badhé dipunumumaken kanthi teratur wonten ing serat kabar puniká.
Éwodènten artá ingkang mlebet miyos De Locomotief antawisipun saking Van Z.R ing Lumajang 15 gulden, kasil nétto Soireé Variée 330 gulden, jumlah sadèrèngipun 2.558 gulden, total 2.903 gulden.