DEN HAAG – Kaluargi kraton Walandi sampun misuwur remen nyepéda, nitih pit, boten namung Ngarsá Dalem Rájá Willem-Alexander, nanging ugi Gusti Kanjeng Ratu Máxima.
Ugi Ibu Suri Ngarsá Dalem Willem-Alexander nggih puniká Ratu Beatrix (sasampunipun lèngsèr keprabon ngastá titel Putri, red) sáhá Éyang Suri Ratu Juliana ingkang sampun suargi ugi remen pit-pitan, nyepéda.
Kejawi makaten párá kaluargi kraton sanèsipun kados párá budhénipun Ngarsá Dalem antawisipun Putri Margriet lan garwanipun Prof. mr. (meester in de rechten, sarjáná hukum, red) Pieter van Vollenhoven.
Ngarsá Dalem Willem-Alexander sáhá Gusti Kanjeng Ratu Máxima nyepéda naliká tindak tilik kriyá dateng daérah Zuidoost-Fryslân, September 2020, sadèrèngipun krisis pagebluk Corona.
Menawi boten wonten pagebluk Corona lan aturanipun ingkang kenceng, janjanipun saben sasi Mei tansah wonten dinten nasional ingkang dipunsebat ‘De Nationale Fiets naar je Werk Dag’ (Dinten Tindak Makaryá Nyepéda Nasional, red). Amargi wonten pagebluk, dinten nyepéda nasional puniká dipunpindhahaken dados September samangké, kanthi syarat menawi pagebluk sampun sirná.
Taun 2010, Ngarsá Dalem lan Gusti Kanjeng Ratu Máxima (wekdal semanten taksih ngastá titel Pangéran Pati lan Putri) budhal nyepéda saking Kastil Duivenvoorde ing Voorschoten. Piyambakipun badhé ngresmiaken paméran ‘Tijdloos Trendy’ (Nggaya Salawasé). Lan pancèn nggaya saèstu kekalihipun nitih sepéda!
Tradisi nyepéda wau ugi sampun dipunterasaken dugi párá putri Ngarsá Dalem sapuniká nggih puniká Putri Pati Amalia, Putri Alexia, sáhá Putri Arianne. Taun 2007 naliká yuswá 3,5 taun, Putri Pati Amalia sampun ketingal nyepéda ing Koninklijke Stallen, Den Haag.
Lajeng naliká dinten kaping sepindhah mlebet SMP, Putri Amalia ugi ketingal nitih sepéda budhal sekolah saking Villa Eikenhorst ing Wassenaar nuju sekolah Christelijk Gymnasium Sorghvliet, Den Haag, tebihipun 9 km, kirang langkung 1/2 jam nyepéda. (es)
