BRUSSEL – Miturut panelitian énggal, cafèine saget ndorong pambakaran lemak ing badan. Èfèk paling saé inggih puniká manawi ngunjuk 2 cangkir alit kopi saring, utawi 1 cangkir alit èsprèsso.
Bilih kopi saget mengaruhi prestasi olahraga sampun kantenan dangu, nanging 1 cangkir kopi jebul gadhah èfèk positif saget ndorong pambakaran lemak. Makaten kasilipun panelitian tim ilmuwan Universitas Granada kados kaserat ing majalah ilmiah Journal of the International Society of Sports Nutrition.
dosis 3 mg/kg caféine tegesipun 3 mg caféine per kg bobot badan
Tim maringi 15 tiyang tugas salebeting pinten-pinten minggu saben jam 08.00 lan jam 17.00 nglampahi olahraga. Setengah jam sadèrèngipun, tiyang-tiyang wau pikantuk placebo lan 3 mg/kg caféine, kirang langkung sami kados ngunjuk 1 cangkir alit èsprèsso.
Dosis 3 mg/kg caféine tegesipun 3 mg caféine per kg bobot badan (BB). Upaminipun BB panjenengan 50 kg, tegesipun panjenengan mbetahaken 3 mg x 50 = 150 mg caféine.
badan kitá gadhah 2 sumber ènèrgi: lemak lan gendhis
Tiyang ingkang pikantuk caféine préstasinipun jebul boten namung saé, nanging ugi grafik pambakaran lemakipun minggah inggil, utaminipun ing wanci sonten. Miturut panelitian wau pambakaran lemak dipundorong déning kopi. Dayanipun ing wanci sonten langkung ageng.
Kasil panelitian wau dipuntegesaken dèning dr. Servaas Bingé, dokter saking Belgia spésialis olahraga sáhá kagungan praktik dokter umum, kados kapethik saking Algemeen Dagblad dinten Jemuah (14/5/2021).
“Kitá sampun dangu pirsá bilih caféine saget ndorong préstasi. Puniká wau wonten gandhènganipun kaliyan cárá badan kitá nganggé bahan bakar naliká olahraga. Badan kitá gadhah 2 sumber ènèrgi: lemak lan gendhis. Saben olahraga nemen, badan badhé mbakar gendhis minongká sumber ènèrgi. Nanging manawi olahraga alon-alon, kados nyepéda, badan badhé mbakar langkung kathah lemak tinimbang gendhis,” ngendiká dr. Bingé.
Punápá urusanipun kalih kopi? “Manawi ngunjuk kopi, badan badhé mbakar langkung kathah malih lemak tinimbang gendhis, ugi manawi olahraga nemen,” makaten dr. Bingé.
Lajeng pinten cangkir kitá kedah ngunjuk kopi? Saking panelitian wau, kitá paling saé manawi ngunjuk 150 mg caféine, kirang langkung 2 cangkir kopi saring utawi 1 cangkir alit ésprèsso kenthel, gumantung kaliyan BB. Kitá saget mawon ngunjuk kopi langkung kathah, nanging boten bakal pikantuk dáyá langkung kathah malih.
Kanthi umum kitá pikantuk manfaat saking kopi, nanging dr. Bingé wanti-wanti bilih satunggal tiyang kaliyan sanèsipun bènten-bènten, boten sami.
Sebagéan tiyang badanipun saget ènggal mprosès caféine tinimbang tiyang sanèsipun. Upaminipun garwá panjenengan jam 22.00 taksih ngunjuk kopi lan saget saré sampurná. Sawetawis panjenengan manawi jam 14.00 taksih ngunjuk kopi, dalunipun boten saget saré.
“Sadáyá wau wonten gandhènganipun kaliyan gèn sáhá ènzim-ènzim ing daleming lever (ati) panjenengan. Menawi ènzim-ènzim wau ngolahipun caféine alon sanget, pramilá caféine wau ugi dipunprosès dangu sanget, langkung dangu ing badan panjenengan, ugi langkung dangu ndorong mbakar lemak,” makaten dr. Binge.
Nyepengi makaten, kitá saget nginten bilih manawi kitá ngunjuk kopi sadèrèngipun olahraga, kitá bakal langkung énggal kuru, BB mandhap, nanging boten makaten. Wonten nuansa ingkang penting.
“Naliká olahraga pancèn lemak ingkang wonten ing badan dipunbakar. Nanging boten lajeng lengen ingkang glambir-glambir utawi padharan gendhut langsung dados susut, sabab ing rah panjenengan ugi wonten kathah lemakipun. Tambahan malih èfèk kopi tetep minimal. Sinten karsá langsing, pramilá langkung pikantuk manfaat menawi dhahar séhat tur gerak badan teratur,” makaten dr. Bingé.(es/es)