DEN HAAG – Pripun caranipun njagi utek tetep ing kahanan top? Kedah dhahar punápá, kapan, pinten kathahipun? Puniká pitutur saking dr Rutger Verhoeff.
oméga 3 wigatos kanggé urat syaraf
dr Verhoeff
Menawi saben dinten kitá dhahar, ngunjuk, saré lan gerak kanthi leres pener pramilá kitá saget kathah ngirangi kamungkinan pikantuk penyakit menawi sepuh mangké, boten namung jasmani, nanging ugi kapikunan.
Organ utek kitá kadamel saking jaringan sèl-sèl syaraf ingkang njlimet ingkang sambung-sinambung satunggal kalih sanèsipun. Pramilá wigatos sanget ngrumat sambungan-sambungan wau lan ndamel sambungan énggal. Kanggé pakaryan ingkang mbetahaken kathah ènèrgi wau dipun preloaken zat-zat pambangun, vitamin lan mineral, utaminipun asem lemak.
kacang kenari kathah ngandhut omega 3
dr Verhoeff
“Omega 3 wigatos kanggé komunikasi ingkang cepet tur saé antawis sel-sel syaraf. Kekirangan Omega 3 saget ndadosaken kirang konsentrasi tur supénan, pikun, ugi dipunkaitaken kalih Schizofrenie lan penyakit Alzheimer,” makaten dr. Verhoeff kapethik saking Algemeen Dagblad dinten Senèn (18/10).
Kacang kenari saé sanget kanggé organ utek. Kacang kenari boten namung ngandhut kathah antioksidan ingkang dipunbetahaken kanggé mberantas radikal bébas, nanging ugi kathah ngandhut asem lemak Omega 3. Saking sedáyá kacang-kacangan, kacang kenari ngandhut paling kathah senyawa wau, utaminipun asem alfa-linolenat (ALA).
“ALA saget nyegah neuro-inflamasi,” ngendiká dr. Rutger Verhoeff.
Sapuniká panjenengan mesthi menggalih 1 + 1 = 2, kanggé utek ingkang bagas waras séhat ènggal tindak dateng toko kacang mborong kacang kenari. Émanipun boten simpel kados makaten.
“Dipunperloaken vitamin-vitamin lan mineral sanèsipun kanggé nyegah organ utek ngalami kamunduran. Supados makaten pramilá dhahar ingkang variatif selang-seling wigatos sanget, kanthi cekap sayur lan woh-wohan. Menawi bosen, dhahar sagenggem kacang kenari saben dinten ugi saget. Kacang kenari saé kanggé organ utek, nyegah penyakit jantung sáhá urat getih (rah) lan diabetes,” makaten dr. Rutger Verhoeff.
Ugi vitamin-vitamin B, kados Omega 3 saget ngatur komunikasi ingkang cepet antawis jaringan urat syaraf ing utek. Kakirangan vitamin B12 saget ndadosaken gangguan kognitif, kados gampil supé. Kejawi makaten mineral-mineral kados yodium (I), sènk (Zn) lan wesi (Fe) ugi wigatos sanget kanggé pangembangan utek laré-laré ingkang taksih tuwuh.
Éwodènten miturut chef-kok Ramon Beuk supados tetep séhat jané gampil boten angèl.
“Dhahar kathah sayur lan woh-wohan supados pikantuk kathah vitamin, antioksidan, lan mineral. Utaminipun selang-seling kalih macem-macem sayur lan woh-wohan puniká wigatos sanget, sarèhning sedáyá wau ugi ngandhut zat-zat gizi ingkang migunani,” makaten Ramon Beuk.
Boten namung kacang-kacangan mawon ingkang ngandhut kathah Omega 3, nanging ugi ulam ingkang nglengá kados ulam lemuru, kembung, lan salem. Ulam ugi sumber vitamin B12. Sumber vegetaris (sanès daging) kanggé vitamin-vitamin B antawisipun polong-polongan lan kacang-kacangan, kados kacang abrit lan kacang ijem.
Kejawi dhahar, ngunjuk ingkang cekap ugi wigatos sanget kanggé utek. Supados utek saget makaryá kanthi saé kedah ngunjuk antawis 2 dugi 3 liter saben dinten.