LISSE – Salebeting sasi-sasi kapengker puniká Keukenhof (taman sekar tulip ingkang misuwur sejagad, red) sampun nyiapaken sedayanipun supados saget bika malih sasampunipun wonten pranatan Corona.
Nanging pamréntah Walandi paring dhawuh dumateng Keukenhof bilih taman sekar tulip puniká dèrèng kénging bika kados waunipun, kejawi nguteri taman mawon kanggé panggénan mlampah-mlampah ngraosaken kaéndahan sáhá asrinipun alam.
Cacahipun tamu ingkang saget mriki dipunwatesi, karcis namung saget dipunpendhet mawi online kanggé wekdal-wekdal ingkang sampun dipuntemtuaken, lajeng kori puter mekanis ugi sampun dipunpasang, saénggá tamu saget mlebet tanpá kontak kaliyan tiyang sanèsipun. Éwodènten sedáyá gedhong ing Keukenhof taksih kedah tutup.
“Damel kuciwá sanget dumateng sinten kémawon ingkang karsá mirsani Keukenhof bilih kami sepindhah malih dèrèng kénging bika taun puniká. Miturut pranatan Covid-19, mlampah-mlampah nguteri Keukenhof taksih aman. Taun kapengker, kami dipundamel kaget déning Covid-19 lan boten kénging bika taman. Tahun puniká kami sampun siyap pranatan Covid-19 lan boten tinemu nalar tiyang-tiyang saget mlampah-mlampah ing taman pundi kémawon ing Walandi, kejawi Keukenhof,” makaten Direktur Keukenhof Bart Siemerink.
Taman Keukenhof puniká wiyaripun 32 hektar, kirang langkung 50 lapangan bal-balan) lan nggadhahi margi mligi kanggé mlampah dowinipun 15 km. Keukenhof mbetahaken wekdal setaun kanggé nyiapaken bika wanci taun salajengipun.
Kejawi ndamel kuciwá sarèhning dèrèng kénging biká taun puniká, ugi ndamel katunan ingkang ageng dumateng firma-firma ingkang dados mitrá, antawisipun saking industri hortikultura sáhá pariwisátá.
Keukenhof puniká taman sekar tulip ugi ajang paméran internasional kanggé séktor florikultura Walandi ingkang dipundamel sareng-sareng atusan firma florikultura. Keukenhof puniká ikon Walandi. Taun 2019 sadèrèngipun wonten pagebluk Corona, Keukenhof dipunrawuhi 1,5 juta tiyang saking pundi-pundi kémawon, antawisipun 20% saking Walandi piyambak, 80% saking máncánegari sejagad.