PEKALONGAN – Sasi kapengker ing Batang kedadosan kacilakan mbedhag, ingkang akibatipun juru bedhag, satunggaling priyantun Ciná, tilar donyá, makaten De Locomotief (6/6/1902).
Kalih priyantun Walandi lan sami kathahipun priyantun Ciná tindak mbedhag cèlèng wonten ing alas alang-alang caket dhusun Depok. Satunggal cèlèng ageng dipunpejahi, sawetawis satunggaling priyantun Ciná wau mbedhil 2 cèlèng alit, lajeng badhé nggantung cèlèng wau wonten ing satunggaling wit, supados boten kanggé rayahan segawon-segawon pamburu.
Naliká piyambakipun taksih nindakaken makaten, bedhilipun jinis tromplader kaliber ageng, dhawah lajeng mungel mbedhil, péloripun nembus pamenthangan kiwánipun.
Satunggaling réncang mbedhag wekdal semanten ugi énggal tindak dhateng Kapitein Ciná ing Klidang, lajeng dhumateng piyambakipun sáhá Wedono Batang lapuran nyuwun kanthi sanget supados réncang ingkang kabedhil wau saénggalipun dipunbetá dhateng Pekalongan, supados saget dipunobati déning dhokter.
Makaten panyuwunan wau dipunwangsuli kanthi rikat, lajeng priyantun ingkang apes wau 16 jam sasampunipun kacilakan dugi Pekalongan, ingkang tebihipun boten wonten 10 km, tatunipun sampun bosok infeksi. Priyantun ingkang tatu wau sampun pejah kanthi sangsárá.
