DEN HAAG – Ing sedáyá wilayah tanah Walandi dinten sapuniká kénging angin prahárá banteripun 80-90 km/jam, ing wilayah pasisir malah saget ngantos 100 km/jam, makaten Koninklijk Nederlands Meteorologisch Instituut (KNMI), Setu (13/3/2021).
Sarèhning kahanan kados makaten, KNMI paring kode bebáyá warni jené. Miturut KNMI, angin prahárá wau dumugi saking arah Kidul Kilèn, utaminipun ing wilayah sisih kidul tanah Walandi ugi badhé dipuntututi kalih jawoh deres, sebagéan malah jawoh ès. Angin nembé bakal sirep mangké dalu, lajeng praharanipun ugi ndèrèk kirang.
Ing daérah Vlissingen banteripun angin énjing puniká dipunukur ngantos 120 km/jam utawi kekiyatan 10 skala Beaufort, tegesipun prahárá ageng sanget. Antawisipun ing daérah IJmuiden lan Houtribdijk kekiyatan angin dugi 9 skala Beaufort. Pinten-pinten stasiun cuaca ing wilayah kilèn paring lapuran bilih kekiyatan angin antawis 100 dugi 115 km/jam.
Kahanan makaten ndadosaken lalulintas utaminipun ing wilayah provinsi Noord Holland lan Zuid Holland morat-marit, antawisipun ing margi ageng A9 arah Amstelveen boten tebih saking Rottepolderplein. Ing mriki wonten mobil ciláká dipunwalik déning angin prahárá wau.
Margi-margi ageng ing daérah Markerwaarddijk antawis Lelystad lan Enkhuizen dipuntutup boten kènging wonten lalulintas amargi angin práhárá wau.
Sawetawis puniká ugi wonten truk ageng ambruk mbalik kénging angin prahárá ing margi A7, boten tebih saking Noord-Hollandse Middenmeer arah Hoorn. Margi A67 antawis Venlo lan Eindoven dipuntutup amargi wonten truk ageng ingkang sami ciláká kados makaten.
Ugi miturut stasiun RTL Nieuws wonten ing kuthá Moerdijkbrug wonten bis mbalik kénging angin prahárá ingkang kekiyatanipun boten kinten-kinten wau, ndadosaken margi A16 Rotterdam arah Breda macet, kados saget dipun pirsani saking fotonipun Rijkswaterstaat puniká.