EINDHOVEN – Punikà busáná ageman Putri Amalia, Putri Alexia, sáhá Putri Ariane naliká riáyá Koningsdag 2021, antawisipun label Natan, Zara, H&M, Majé, lan Marina Raphael, sebagéan ngagem kagunganipun Kanjeng Ratu.
Senaosá dèrèng saget kados wekdal normal sadèrèngipun pagebluk Covid-19, riáyá Koningsdag dinten tanggap warsá Ngarsa Dalem Rájá Willem-Alexander (54) ing 27 April 2021 sampun kalaksanan kanthi sumringah.
Kaluwargi kraton ngagem busáná pista rawuh ing Eindhoven, kuthá ingkang kadhapuk minongká pusering Koningsdag 2021. Putri Amalia, Putri Alexia sáhá Putri Ariane milih ngagem gathukan antawis high-street kaliyan high-fashion, kalebet aksésori ngampil kagunganipun ibu, Kanjeng Ratu Maxima.
Putri Amalia, putri pati ingkang bakal marisi makutá, ngagem pantalon ijem kaliyan inggilan biru enèm damelan griyá mode Belgia, Natan. Kanggé nyampurnaaken paningalan, Putri Amalia ngagem jas biru enèm lan clutch warni ijem, ngampil kagunganipun ibu, Kanjeng Ratu Maxima, makaten website Modekoningin Máxima kapethik saking Glamour dinten Senèn (3/5/2021).
Éwodènten Putri Alexia milih ngagem casual-chique outfit mawi paningalan sarwá warni krèm, monochrome look. Ageman blus piyambakipun mathuk kaliyan vèst damelan high-street label Maje, lajeng high-heel piyambakipun ingkang warni cemeng puniká damelan label Zara.
Putri Alexia, ragil saking 3 putri, ugi kénging ngampil aksésori kagungan ibu, Kanjeng Ratu Maxima. Alexia milih tas astá warni cemeng, ingkang naté dipunagem déning Kanjeng Ratu Maxima naliká tilik kriyá ing Eindhoven sadèrèngipun. Alexia milih royal blue midi-dress damelan label Natan sáhá tas rafia kulit damelan label Marina Raphael, lajeng jas ngampil saking kagungan ibu, Kanjeng Ratu Máxima.
Ngarsá Dalem Willem-Alexander piyambak milih ngagem setèlan jas klasik biru donker, sawetawis Gusti Kanjeng Ratu Maxima milih ngagem paningalan jacquard damelan griyá mode Belgia, Natan.
High-street Avondlooks
Sontenipun naliká ngrawuhi konsèr ing Kraton Noordeinde, Den Haag, párá putri gantos ageman siang dados ageman sonten. Párá putri milih high-street outfits kanthi swasáná alamiah. Putri Pati Amalia ngagem paningalan warni krèm, pantalon pethak, lajeng atasan warni emas saking label Zara lan jas krèm saking Massimo Dutti. Piyambakipun ugi ngastá tas Marina Raphael sáhá high-heel warni metalik.
Sawetawis Putri Alexia ngagem paningalan casual: atasan modèl pofmouwen saking label H&M, legging corak kothak-kothak saking label Zara sáhá snickers Nike Air Force 1. Éwodènten Putri Ariane milih ngagem paningalan pethak-cemeng, kanthi pantalon saking label Zara, blouse pethak, sáhá snickers ingkang sami kaliyan kakangmbak Putri Alexia.