DEN HAAG – Ngarsá Dalem Rájá Willem-Alexander dinten sapuniká Selásá, 27 April 2021 tanggap warsá ingkang kaping 54, dipunwastani Koningsdag (Dinten Rájá) lan dados libur nasional.
Ing dinten puniká kawulá Walandi biasanipun riáyá karaméan, nanging sarèhning wonten pagebluk Corona sampun wiwit taun 2020 dugi dinten sapuniká boten nganggé ramé-ramé malih, sakirangipun kanggé sawetawis.
Kéjawi makaten, tradisi kawulá Walandi naliká Koningsdag nggih puniká dhahar camilan tompouce utawi tompoes, nggih puniká dhaharan rupi kothak ingkang éksak ukuranipun 4 x 10 cm, dhasaripun kalih lapis adonan ingkang kemrenyes gurih, lajeng antawisipun wonten isi bankèt lembut manis, inggilipun dipunlapisi glazur warni oranje, warni simbol trah Oranje, Het Huis van Oranje, dinasti Karajan Walandi.
Tompouce dipun dhahar minongká layan ngunjuk kopi utawi tèh ing café-café kaliyan párá réncang, utawi ing griyá sareng-sareng kaluargi. Miturut tradisi, kantor-kantor utawi firma-firma ingkang boten libur mesthi nyaosaken tompouce kanggé párá punggawanipun naliká wekdal ngopi.
Ing dinten puniká párá kawulá Walandi salebeting pistá, riáyá biasanipun ramé-ramé ngagem ageman sarwá warni oranje, ugi wig lan corat-corèt warni oranje, ingkang sampun dados warni nasional bongsá Walandi, ingkang ugi ketingal menawi tim nasional bal-balan ndhèrèk kompetisi Piala Eropa utawi Piala Donyá.
Naliká Koningsdag ugi wonten vrijmarkt (peken bébas), nggih puniká párá kawula Walandi bébas sadéan punápá kémawon tanpá idin saking pamréntah, ugi boten kénging pajeg. Sadéanipun nggih puniká barang-barang tweedehand (barang bekas, kalebet barang-barang antik) ing taman-taman, pinggiran margi ing pusering kuthá, camilan, lajeng main musik, ndadosaken kahanan ramé sumringah.