DEN HAAG – Sinten remen kopi bakal mbayar sangsáyá awis tur raosipun kirang énak, kirang écá, akibat owahing iklim.
Regi kopi Arabica dugi dinten sapuniká wiwit taun 2001 sampun mlesat 370%, lajeng wiwit awal taun puniká mawon sampun mindhak 70%. Wekdal sapuniká produsèn mbayar kopi mentah US$ 2,09 (Rp 30.000) per 454 gram kopi Arabica. Éwodènten kopi Robusta sapuniká sampun mindhak 50% wiwit awal tahun.
Miturut analis Rabobank London, Carlos Mera, sedáyá wau kasebab owahing iklim, sebagéan malih ugi krisis Corona.
“Kaping sepindhah puniká amargi iklim ing Brazil, produsèn kopi paling ageng sajagad. Tahun wingi mèh mboten wonten jawoh ing Brazil, akibatipun kathah taneman mboten saget tuwuh. Sesarengan kalih wau ing kongsá adhemipun adhem samget, saénggá langkung kathah taneman ingkang mati,” makaten Mera.
Akibat salajengipun panèn kopi pinten-pinten tahun dados gagal, sarèhning wit kopi mbetahaken wekdal 7 taun kanggé ngasilaken sekar lan woh kopi. Pamréntah Brazil ngaturaken bilih puniká panèn kopi Arabica paling awon salebeting wekdal 12 tahun.
60% Sirná
Sampun wiwit taun 2019 párá ilmuwan mprèngetaken ing majalah Science Advanced bilih 60% saking sedáyá varietas taneman kopi bakal punah, sirná. Menawi boten wonten tumindak malah taneman kopi Arabica bakal sirná sadèrèngipun taun 2080. Sebab ingkang paling utami inggih puniká owahing iklim, bumi sangsáyá bentèr ndadosaken lemah garing, lajeng kantun sakedhik mawon ingkang saget dipuntanemi kopi Arabica.
Pancèn taksih wonten taneman kopi varietas sanèsipun, nanging kualitasipun kirang saé lan kathah saking varietas wau ugi mèh sampun punah. Wekdal dinten sapuniká ugi wonten sebab sanèsipun ingkang ndadosaken regi kopi mlesat awis, inggih puniká kekirangan kontainer kanggé ngangkut kopi, sarèhning wonten pandemi Corona.
“Kopi ekspor diangkut nganggé kontainer. Sarèhning regi sewá kontainer tahun wingi mindhak inggil, puniká ugi mengaruhi regi kopi,” makaten Mera.
Naliká awal krisis Corona, kathah pelabuhan lockdown, tutup, kontainer-kontainer numpuk boten kanggé, amargi dedagangan internasional mandheg. Sapuniká dedagangan wau mulai normal malih langkung cepet, lajeng pelabuhan lan leveransir kontainer boten saguh ngadhepi panyuwunan. Sapuniká regi séwá €15.000 per kontainer, padhahal sadèrèngipun namung €2.000 per kontainer.