Serangan Oemoem (SO) 1 Maret 1949 nggih puniká salah satunggaling lelampahan sejarah ing Jogjakarta babagan paprangan minongká mbélani lan njagi kedaulatan Republik Indonesia.
Sasampunipun perang dangunipun 6 jam, párá prajurit republik sareng-sareng rakyat saget nggusah mundur sárádadu Walandi lan saget mlebet nguasai Jogjakarta ingkang wekdal semanten dados ibukuthá Republik Indonesia.
Lelampahan wau dipunprèngeti Abdi Dalem Musikan ingkang dipunastá déning KHP Kridhomardowo Karaton Ngayogyakarta Hadiningrat kanthi mitontonaken Musikan Mandalasana nganggé titel “6 Jam ing Jogja”, Senèn, 1 Maret 2021, wonten ing panggènan Kagungan Dalem Bangsal Mandhalasana, presis jam 08.00 WIB, sesarengan kalih unènipun sirene prèngetan Serangan Oemoem 1 Maret.
“Tontonan Musikan Mandalasana kanggé mrèngeti 6 Jam ten Jogja puniká saèstunipun minongká ngaturi masyarakat ngèngeti malih serangan 6 jam ten Jogja tanggal 1 Maret 1949. Serangan ingkang dipunprakarsai Ngarsá Dalem Sri Sultan Hamengku Buwono IX puniká saget mbiká socanipun jagad internasional bilih kedaulatan Republik Indonesia taksih wonten. Dados, mánggá kitá sami mundhut tuládhá sartá ngèngeti malih perjuangan Ngarsá Dalem lan párá pejuang sanèsipun ingkang sampun suargi gugur mbélani kamardhikan Republik Indonesia,” makaten KPH Notonegoro kados dipunpethik saking Kraton Jogja.
Amargi taksih mángsá pagebluk Covid-19, pramilá Kraton Jogjakarta ngawontenaken tontonan puniká kanthi virtual mawi siaran langsung kanal Youtube Kraton Jogja. Párá Abdi Dalem ingkang tugas ugi ngetrapaken protokol keséhatan kanthi temen. Jumlahipun penabuh musik ugi dipunwatesi supados tetep saget njagi let miturut protokol. (es)