DEN HAAG – Kraton Noordeinde sáhá Istal Kraton bika malih kanggé párá kawulá saben dinten Setu kawiwitan mangké suryá kaping 23 Juli.
Wonten ing Kraton Noordeinde saget dipunpirsani ingkang nami Corps de Logis, antawisipun Grote Balzaal (Bangsal Ageng) lan Balkonkamer (Kamar Balkon).
Sawetawis ing Istal Kraton antawisipun saget dipunpirsani De Gouden Koets (Karétá Kencáná), De Glazen Koets (Karétá Kácá) lan De Koninklijke Bus (Bis Kraton).
Tamu bakal pikantuk piknik multimedia gratis ingkang ngemu sambutan Ngarsá Dalem sáhá cariyos Abdi Dalem Kraton babagan pakaryan ing kraton.
Kraton Noordeinde
Kraton Noordeinde kalenggahan ing Den Haag inggih puniká kraton ingkang dados kantoripun Ngarsá Dalem sáhá panggènan makaryá párá Abdi Dalem.
Saben taun kathah tamu saking Tanah Walandi lan máncá, kanggé audiènsi, dhahar siang, krédénsial Dutá Ageng, sáhá panganugerahan Appeltjes van Oranje.
Kraton puniká sampun 500 taun, naté dados dalemipun Louise de Coligny (prameswari Willem van Oranje), Frederik Hendrik, lajeng Willem I. Ratu Wilhelmina sáhá Ratu Juliana lahir ing mriku.
Istal Kraton
Taun 1815 Ngarsá Dalem Willem I dhawuh ndamel Departemèn Istal ingkang taksih dipunanggé dugi dinten sapuniká, komplit mawi tradisi, karétá lan jas kusir kuná.
Departemèn puniká tanggung jawab ngurusi tunggangan kraton sáhá tetamunipun, tradisional lan modern, wonten 30 turánggá lan 70 karétá, antawisipun Karétá Kácá.
Kaping sepindhah Karétá Kencáná mangké saget dipunpirsani, ugi kendaraan sejarah lan modern, kados Audi A8 sáhá bis kraton, sebagéan hibrida, sebagéan 100% listrik.
Karcis
Karcis mlebet Kraton Noordeinde reginipun € 10,00, mlebet Istal Kraton € 7,50. Asmá panjenengan kaserat ing karcis, lajeng ugi kedah ngastá kartu jati diri.
Ugi wonten karcis gandhèngan kanggé mlebet Kraton lan Istal reginipun €15,00. Karcis namung saget kanggé mlebet ing dinten lan wekdal ingkang kaserat ing karcis.
Tamu pikantuk multimediatour gratis kanggé mlebet Kraton Noordeinde lan buku katrangan naliká mlebet Istal Kraton.
Tamu yuswá dugi 18 taun saget mlebet gratis, nanging kedah pesen karcis atas nami piyambakipun. Per booking namung saget pesen 6 karcis.
Kraton bika jam 10.00-17.00, éwodènten Istal Kraton jam 12.00-17.00. Karcis saget dipunpesen mangké suryá 14 Juni jam 10.00 mawi https://www.koninklijkeverzamelingen.nl/tickets. (es/es)