EINDHOVEN – Kuthá Eindhoven dados pusering riáyá Koningsdag 2021. Ngarsá Dalem sakeluargi rawuh ing kuthá ingkang misuwur minongká Kuthá Cahyá, amargi Eindhoven puniká kuthá kalenggahanipun pabrikan èlèktronik lan lampu Philips.
Sarèhning wonten pagebluk Corona, Koningsdag sapuniká bènten kaliyan taun-taun sadèrèngipun.
“Mawi desain lan teknologi Brainport Eindhoven ndamel acárá kanggé párá kawulá Walandi ingkang mathuk kaliyan pranatan sáhá protokol kanggé nanggulangi virus Corona wekdal sapuniká,” makaten Rijksvoorlichtingsdienst.
Sadèrèngipun riáyá Koningsdag taun 2021 badhé dipunlaksanaaken ing kuthá Maastricht, nanging amargi pagebluk Coroná dèrèng sirná lajeng dipunpindhah dateng Eindhoven. Minongká wakil kutháprájá Eindhoven, juruwicárá Thijs van Son mangsuli kanthi sumringah.
“Kami temtu kémawon bingah sanget naliká nampi kabar wau,” ngendiká Thijs van Son, nanging boten kersá ngaturaken pripun rawuhipun Ngarsá Dalem saget dipunalihaken dateng Eindhoven utawi pinten dangunipun rembugan ngantos Eindhoven saget dados pusering Koningsdag 2021.
“Kaliyan Rijksvoorlichtingsdienst sampun wonten prajanjian bilih kami boten saget matur kathah-kathah,” makaten Thijs van Son.