Párá arkeolog ing Mesir manggihi kuthá komplit kalih tigá kraton saking jaman Fir’aun.
Kuthá puniká, kadosipun paling ageng saking jaman kuná Mesir, pinten-pinten abad boten ketingal amargi ketutup wedhi ing wilayah Luxor, boten tebih saking Wādī Abwāb al-Mulūk ( وادي ابواب الملوك ) utawi Lembah Gerbang Rájá. Kathah gedhong sáhá barang-barangipun taksih wutuh.
Kuthá ing dhaerah Mesir Tengah puniká dipunbangun 3400 taun kapengker naliká jamanipun Fir’aun Amenhotep III ingkang digdáyá. Párá arkeolog boten njarag madosi kuthá kuná, wiwitanipun ing September taun wingi ndhudhuk madosi kuil, nanging énggal cethá kepanggih bangunan bátá saking sedáyá arah jangkep kaliyan témbok lan kamar kebak keajiban, makaten arkeolog Mesir, Zahi Hawass.
Kejawi barang-barang sadinten-dinten kados kendhil, oven, ugi kepanggih patung-patung sáhá artefak sanèsipun.
Ahli Mesir Kuná saking Amerika Dr. Peter Lacovara ngendiká bilih papanggihan kados ‘Pompeï’ (kuthá kuná ing Italia, red) puniká wigatos sanget.
“Papanggihan kuthá ingkang ical puniká papanggihan arkeologi paling wigatos sanget sasampunipun papanggihan pasaréan Toetanchamon,” makaten Guru Besar Ilmu Mesir Betsy Brian saking Universitas Johns Hopkins, Amerika.