DEN HAAG – Floriade 2022 ingkang badhé dipunlaksanaaken wonten ing wilayah kutháprájá Almere badhé dipunowahi, tundhá, utawi dipunbatalaken.
Puniká wau kasebat ten layang pamréntah kutháprájá ingkang dipunkintun dumateng gemeenteraad (DPRD Kutháprájá).
Saben-saben opsi saking tigang opsi ingkang dipunaturaken wau nggadhahi konsekuènsi finansial lan yuridis. Contonipun menawi milih Floriade skala langkung alit pramilá badhé narik sekedhik pengunjung, tegesipun sekedhik kasil saking sadéan karcis.
Dipuntundhá ugi nggadhahi konsekuènsi-konsekuènsi yuridis, antawisipun kalih pihak developer Amvest lan Dura Vermeer sampun dipuntèken kontrak bilih menawi Floriade rampung miturut tanggal kontrak, Amvest lan Dura Vermeer saget sadéan griyá ing panggénan kanggé Floriade wau.
Dipunlajengaken kanthi rencáná sapuniká miturut pamréntah kutháprájá Almere ugi boten saget.
“Kanthi panyebaran wabah virus Corona ingkang cepet lan sakdonyá, sinten kemawon mlebet wekdal ingkang gonjang-ganjing lan mboten temtu,” makaten pamréntah kutháprájá Almere.
Persiapan kanggé Floriade pancèn sampun ngalami masalah wiwit taun 2012 naliká pamréntah kutháprájá Almere menang lélang kanggé nglaksanaaken paméran.
Antawisipun biayanipun mindhak kathah sanget. Wiwitanipun pamréntah kutháprájá Almere namung kedah mbayar Euro 10 yutá saking biaya total Eur 93 yutá ingkang dipunprakiraaken. Sisanipun saking pamréntah provinsi Flevoland, pamréntah pusat, sponsor, lan saking 2,1 karcis pengunjung.
Sakpuniká pamréntah kedah nanggung biaya Euro 39,5 yutá lan kadosipun taksih kedah nambah 3 dugi 6 yutá, makaten kasunyatan per akhir Februari 2020.
Artá puniká miturut Jan Hoek (GroenLinks), pejabat wekdal semanten ingkang ngastá Floriade, antawisipun dipunbetahaken saénggá Floriade BV, ingkang ngorganisir pamèran puniká lan kutháprájá Almere minongká panyepeng saham tunggal, saget narik sponsor.
Nanging dugi dinten sapuniká dereng wonten satunggal-satunggalá kontrak ingkang sampun dipuntapakastá lan minat negari-negari kanggé ndhèrèk Floriade 2022 ugi sekedhik sanget. Namung wonten 8 negari ingkang sampun ndaftar bilih badhé ndhèrèk paméran Floriade 2022.
Déwan sampun nugasaken Harry van Dorenmalen, mantan direktur IBM Nederland lan IBM Benelux, kanggé neliti opsi pundi ingkang paling saé. Dinten Kamis samangké Déwan kutháprájá badhé rapat malih mbahas perkawis Floriade.
Direktur ad-interim Floriade BV, Pieter Cloo, ngendiká bilih saé menawi sampun dipun damel skenario makaten.
“Pitakènanipun: punápá kitá ing taun 2022 taksih saget ngawontenaken Floriade ingkang temen? Kitá yakin ‘nggih’ saget. Menawi wabah virus Corona sampun susut, taksih wonten cekap wekdal kanggé nyiapaken Floriade. Dipunsetop utawi tundhá badhé buang biaya langkung kathah,” makaten Pieter Cloo.
Miturut Cloo, taksih dèrèng wonten calon pendhèrèk Floriade ingkang mbatalaken kontrak. Jumlah pengunjung, ingkang kathahipun saking dalem negari Walandi, dipunarepaken langkung kathah.
Floriade ingkang kepungkur kasunyatanipun kirang sukses. Tigá edisi Floriade ing Venlo (2012), Haarlemmermeer (2002) lan Zoetermeer (1992) sedáyá wau rugi pinten-pinten yutá Euro, antawisipun amargi mboten cekap pengunjung.
