LIMPUNG – Kanggé nindakaken rencáná mbangun slachthuis (griyá pambelèhan, sapuniká Rumah Pemotongan Hewan, red) ing Limpung dipunbetahaken anggaran 500 gulden.
Wonten ing rembugan kabupatèn (Batang sampun mlebet Kabupatèn Pekalongan, red) samangké badhé dipunusulaken kanggé nindakaken rencáná wau, makaten De Locomotief, serat kabar babaran Uitgever De Groot, Kolff & Co, Semarang, dinten Setu (9/4/1938).
Miturut anggaran dipunprakiraaken biaya griyá pambelèhan wau saben sasi 25 gulden, lajeng panampinipun saking retribusi saben sasi 75 gulden, saénggá griyá pambelèhan Limpung saget dipunanggep rèndabel utawi bathi.
Totalipun wonten 27 dhusun sakeliling griyá pambelèhan ingkang kedah ndhèrèk ngginaaken griyá pambelèhan. Ing dhusun-dhusun puniká, kinten-kinten radius 5 km saking griyá pambelèhan, bakal pikantuk larangan mbelèh kéwan kejawi ing griyá pambelèhan wau.
Sawetawis kabar Batang sanèsipun inggih puniká ordonansi kabupatèn (perda, red) netepaken bilih makaryá, panyerahan, lan pangangkutan kanggé kabupatèn kedah nawi tènder, aturan ingkang pinten-pinten taun boten naté dipuntrapaken.
Asringipun malah dipunéndhani naliká kabukti bilih pakaryan utawi proyèk ingkang dipuncepeng piyambak langkung mirah tur cepet. Tuládhá: pambangunan poliklinik ing Limpung, ndandani kretek ing mari antawis Banjar-Mijen lan renovasi los pasar ing pinten-pinten panggènan.
Sarèhning makaten, ing rapat kabupatèn samangké badhé dipunusulaken bilih (1) pakaryan ingkang mboten nganggé tènder, dipunparingaken namung demi kawigatosan kabupatèn, (2) gumantung jinis lan agengipun pakaryan, aannemer ingkang nggarap kedah netepi syarat: (a) nggadhahi alat lan artá ingkang nyekapi, (b) mitayani, (c) saguh netepi kewajibanipun. (es/es)