LIMPUNG – Kálá dinten Setu, 13 Oktober 1934 kapengker dipunawontenaken pamèran rájákáyá ing Limpung, ingkang pikantuk wigatosan saking pamongprájá Walandi sáhá pribumi, makaten kapethik saking De Locomotief, Kemis (18/10/1934).
Batang dados pusering panyilangan lembu punuk (Bos primigenius indicus) kalih lembu Jawi
dr. Doeve
Antawisipun rawuh résidèn Pekalongan, asistèn résidèn ngrangkep walikuthá Pekalongan, panilik sáhá wakil panilik Pekalongan, asistèn résidèn Tegal, wakil panilik Brebes, Bupati Pekalongan, Tegal, Brebes lan Batang, lajeng sedáyá wedáná saking Kabupatèn Batang sáhá wilayah sanèsipun, pamriksá artá saking Semarang, panilik Dinas Kedokteran Kéwan, dokter kéwan saking Tegal, sáhá dokter kéwan saking Pekalongan.
Kanggé pamèran puniká dalemipun asistèn wedáná (sadèrèngipun pasanggrahan) minongká panggènan pamèran dipunpajang semarak. Korps musik saking Pekalongan dipunrawuhaken kanggé ngénggar-énggaraken párá rawuh. Ugi wonten gamelan sáhá panantunipun minongká panglaras párá tiyang pribumi ingkang nonton rawuh saking pundi-pundi panggènan.
lembu puniká langkung ageng tur lemu, langkung kiat makaryá, langkung kathah ngasilaken
dr. Doeve
Naliká jam 10.00 énjing résidèn Pekalongan dugi rawuh, Bupati Batang ngaturaken sugeng rawuh, lajeng ngaturaken pidato ingkang antawisipun nerangaken tujuanipun pamèran, antawisipun kanggé ndorong párá kawulá ingkang kagungan rájákáyá, kalebet majengaken paédah-paédah ingkang sayektás.
Salajengipun Pangarsá Panilik Dines Kedokteran Kéwan Provinsi Jawi Tengah dr. Doeve ingkang sampun ngrawuhi wiwit pamèran ingkang kaping sepindhah taun 1914 ngaturaken punápá ingkang sampun dipun ranjuk mawi pamèran puniká.
Miturut dr. Doeve, Kabupatèn Batang puniká minongká dhaérah ingkang sampun pinten-pinten puluh taun dados pusering panyilangan lembu punuk (Bos primigenius indicus) kalih lembu Jawi supados saget pikantuk lembu ingkang langkung ageng tur lemu, langkung kiat kanggé prestasi makaryá, lajeng langkung kathah ngasilaken naliká dipunsembelih utawi dipunsadé. Sapuniká Batang dipunandelaken minongká dhaérah paling majeng ing perkawis sedáyá èkspèrimèn puniká.
“Lembu-lembu kados sapuniká dipunpranakaken saget dipunwastani minongká monumèn gesang saking karyanipun Bupati Batang,” makaten dr. Doeve.
Éwodènten Résidèn Pekalongan ngèngetaken bilih piyambakipun ugi ngrawuhi pamèran taun kapengker lan mirsani bilih karsá kanggé majengaken séktor rájákáyá sampun mlampah malih majeng sajangkah. Piyambakipun wanti-wanti bilih senaosá puniká wekdal ingkang angèl taksih saget nyisihaken artá kanggé majengaken séktor rájákáyá puniká.
Sasampunipun Bupati Batang ngaturaken dongá séhat kuwarasan, Résidèn Pekalongan kanthi resmi mbika pamèran rájákáyá kaping 14, lajeng kanthi ngangkat gelas champagne lan hura kaping 3 dipunaturaken dongá kaséhatan kanggé Résidèn.
Salajengipun lembu-lembu ingkang sadèrèngipun sampun dipun pilih déning déwan juri, ingkang anggotanipun dokter-dokter kéwan tingkat provinsi saking Semarang, Tegal lan dokter kéwan bongsa pribumi saking Pekalongan, dipungiring miturut grup ing urutan makaten:
1. Ras asli jaleran Bengal minongká juara 1 pikantuk hadiah 20 gulden dumateng lembu jaler dhusun Dlimas, Kecamatan Subah, juara 2 hadiah 17,5 gulden lembu jaler idem dito, juara 3 hadiah 15 gulden dhusun Sokomangli, Bawang; juara 4 hadiah 12,5 gulden dhusun Sangubanyu, Bawang.
2. Pedhèt-pedhèt kasilipun silangan mriki.
3. Lembu-lembu jaleran ras asli Ongolo.
4. Lembu-lembu babon ras asli Ongolo.
5. Lembu-lembu turunan dominan ras Bengal.
6. Lembu-lembu babon ras dominan Bengal.
Kanthi cekak aos dokter kéwan R. M. Soedono, saking Pekalongan, nerangaken lembu-lembu pundi ingkang makili saben kelompokipun, caranipun tumbas, pundi ingkas ras asli, sáhá panggènanipun.
Lembu narik gerobak, medal kalebet grup 5 lan 6, asalipun saking ras asli banthèng Bengal kalih ras asli lembu Jawi ingkang sampun kawin silang turun-temurun 20 taun dangunipun.
Kanthi khusus dipunèngetaken sayektos bilih Bupati Batang sareng sedáyá punggáwá B.B (binnenlandsbestuur, kemendagri, red) tansah kagungan paningal kanggé majengaken rájákáyá ing wilayahipun sáhá sedyá makaryá sareng kalihan párá dokter kéwan saking dines pakéwanan.
Sasampunipun sedáyá lembu lan banthèng sáhá pedhèt dipunbarisaken keliling, lajeng hadiah kanggé juara 1 dipunparingaken, éwodèntèn dumateng juru rumat 33 banthèng sanèsipun pikantuk bayaran prémi 7,5 gulden per banthèng. (es/es)