DEN HAAG – Kanthi mungkasi lockdown, kabinèt ngarsaaken maringi kamardikan dateng masyarakat sakathah-kathahipun, nanging tetep saget nanggulangi pandemi mawi kartu Corona arupi QR code.
“Wekdal sapuniká kitá dèrèng badhé mbuang CR code,” makaten dhawuh Menteri Keséhatan Ernst Kuipers naliká maringi konferènsi pèrs dinten Selásá (25/1/2022) dalu.
Miturut Kuipers, kanggé mlebet rèstoran, café, lan acara kabudayan taksih dipunperluaken kartu kontrol arupi 1G, 2G utawi 3G.
Pranatan 3G (gevaccineerd, genezen, getest = sampun vaksin, sampun saras, sampun tès, red) párá wargi mawi QR code kedah nedhahaken bilih piyambakipun sampun pikantuk vaksin jangkep, sampun saras saking Covid-19, utawi nembé tès negatif PCR, ingkang dipunwiyaraken dugi panggènan makaryá andadosaken debat panas ing masyarakat lan parlemèn.
Pangetrapan 2G (gevaccineerd, genezen = sampun vaksin, sampun saras, red) pikantuk panolakan. Ing Tweede Kamer (parlemèn) sebagéan partai politik ngarsaaken pranatan 1G mawon, nggih puniká sinten kémawon kedah tès menawi badhé mlebet, senaosá sampun pikantuk vaksin jangkep.
Perkawis debat babagan 1 G, 2G utawi 3G, Menteri Kuipers ngendiká bilih piyambakipun boten badhé nggégé mongsá. Miturut piyambakipun sampun wonten rancangan UU kanggé ngatur perkawis puniká ingkang badhé dipunbahas ing parlemèn.