SOLO – ‘Marikangen’ rokok utami andelan priyantun Solo jaman Walandi. Nganggé cengkèh impor saking Zanzibar, reginipun sawungkus 1 sèn isi 4 rokok.
Pabrik rokok ‘Marikangen’ kalenggahan ing pinggir margi Daendels arah Semarang-Kartásurá. Pabrikipun saget katitèn mawi seratan ‘Marikangen’ ing bagéan ngajeng.
Tiyang Jawi lan Tionghoa ing Jawi-Tengah, Jogja, Surákartá, Jawi-Kilèn sampun raket kalihan ‘Marikangen’, amargi sadinten rátá-rátá ngudud 20 rokok puniká.
Wonten pilihan saus tunggal utawi dobel, nganggé cengkèh ingkang misuwur saking Zanzibar, lajeng pegonipun mawi raos éco dipunsedhot dugi paru-paru.
Rokok Énggal
Dirèktur ugi ingkang kagungan pabrik rokok paling ageng ing Surákartá puniká Ong-Siang Tjoen. Piyambakipun naté dados astá-tengenipun Oei Tiong Ham, milyunèr Semarang.
Buruh Marikangen sapuniká cacahipun wonten 4.000 priyá lan 700 wanitá ingkang makaryá damel rokok mawi astanipun, sabagéan sanèsipun mawi mesin sederhana.
Wolung tahun kapungkur pabrik rokok Marikangen puniká dèrèng wonten. Ingkang kagungan pabrik wekdal samanten langkung ngarsaaken dados agèn mobil.
Nanging naliká krisis 1930 pabrik rokok merk ‘Prijajie’ bangkrut, pabrik ‘rokok pethak’ puniká dipunpundhut, lajeng damel rokok krètèk mawi raos lokal kados Sampoerna ing Surábáyá.
Wekdal samanten rokok ingkang kondhang inggih puniká ‘rokok pethak’ model Kilèn lan klobot, nanging rokok krètèk saèstu-èstu inovasi énggal.
Sampoerna ingkang miwiti damel rokok krètèk mawi regi 5 sèn isi 10 iji, lajeng Marikangen tahun 1932 nyusul damel mawi regi 1 sèn isi 4 iji.
Naliká ndamel Marikangen, nembé mawon medal Tabaksaccijns-Ordonnantie (Pranatan Cukai Satá), 15 Désèmber 1932, makaten Het Nieuws van den Dag voor Nederlandsch-Indië (11/7/1938).
Sarèhning ordonansi puniká, cerutu lan rokok kénging cukai, ndadosaken reginipun langkung awis, pabrik-pabrik ngadhepi stok produksi kemasan lawas, kangèlan nyadé.
Marikangen mboten ngadhepi kahanan kados makaten, lajeng ndamel kemasan énggal, raos lan regi ingkang mathuk kaliyan kahanan. Strategi puniká dados kunci suksès.
Marikangen nganggé politik-regi 1 sèn isi 4 iji utawi 8 iji miturut kualitasipun, lajeng 3 sèn isi 15 iji utawi 25 iji ugi miturut kualitasipun.
Rokok ‘Marikangen’ puniká kondang sanget ing Surákartá, Ngayogyákartá, Kedu, Semarang, lan Madiun, utaminipun ingkang jinis rokok utawi sigarèt krètèk. (es/es)