DEN HAAG – Sakedhik sanget siswá SD ing Walandi saget pikantuk biji Matematika ingkang saé miturut standar.
Sababipun amargi piwulangan Matematika wau kirang mathuk kalih potensi párá siswá, makaten pangawas wiyátá kados kaserat ing lapuran Peil.Rekenen-Wiskunde, dinten Jemuah (9/4/2021).
Ing pungkasan wekdal sekolah dhasar, 65% siswá kedah saget Matematika tingkat 1S, makaten ambisi Komsi Meijerink naliká netepaken beleid makaten ing taun 2009. Kasunyatanipun dugi taun 2019 ongkanipun boten ngantos 33%.
Bilih kathah siswá boten saget ngancik tingkat 1S, puniká miturut pangawas amargi kathah sekolah ingkang dèrèng pirsá standar wau. Sekolah-sekolah klèntu nginten piyambakipun kalih párá siswá kedah ngudi dugi tingkat 1F, sawetawis 1F puniká standar minimal, sanès standar ingkang kedah dipun cepeng miturut Komisi Meijerink.
Kejawi makaten ing dalem kelas kathah wekdal telas kanggé párá siswá ingkang kangèlan tumrap piwulangan Matematika. Padhahal wekdal wau saget kanggé párá siswa ingkang langkung saguh ngadhepi piwulang Matematika.
“Malah menawi párá siswá wau saget paham, lajeng pitakènan salajengipun punápá párá siswá wau pancèn bakal nganggé kawruh Matematika wau,” ngendikan pangawas wiyátá.
Pangawas wiyátá paring pitedhah kanggé sekolah-sekolah supados langkung sadhar antawis standar minimal 1F lan standar 1S ingkang kedah dipuncepeng. Kejawi makaten párá guru piyambak ugi kedah kathah pikantuk pawiyatan supados saget mulang langkung ndayani.