DEN HAAG – Poep sapuniká pikantuk wigatosan kathah, sangsáyá kathah kawruh, kitá sangsáyá sadhar njagi usus lan flora usus supados tetep séhat.
Industri ugi sampun maringi wigatosan kanthi ndamel app ingkang saget kanggé ngemat-ngemati poep ambetipun, warni, lan bentukipun kados pundi, lajeng tegesipun pripun. Ugi sampun wonten pangembangan toilet pinter ingkang saget maos poep pratándhá penyakit punápá, malah saget maos pratándhá kanker usus, makaten kapethik saking Algemeen Dagblad (13/10).
Usus puniká tugas ndhasaripun mundhut zat-zat gizi lajeng mbuang ampas utawi kotoranipun. Menawi tugas wau mboten saé pramilá zat-zat gizi wau kebuang langsung ing toilet. Panjenengan ugi ngraos boten sekécá. Menawi buang kotoran boten saé utawi boten lancar panjenengan ugi bakal pikantuk rupi-rupi gangguan.
Rupi-rupinipun poep kados dipunbabaraken ‘dokter poep’ Nienke Gottenbos saking bukunipun De Poepdokter: Gezond van Mond tot Kont (Dokter Poep: Séhat Saking Tutuk Dugi Wingking, red) makaten:
Tipe 1 & 2
Pratándhá obstipasi utawi bebelen, biasanipun telat pinten-pinten dinten, angèl anggènipun medalaken. Kathahipun jalaran kirang ngunjuk, kirang serat, kirang vèt (lemak).
Tipe 3 & 4
Saé, normal. Kanggé ngresiki boten mbetahaken tisu toilèt utawi toyá kathah, boten ngambang nanging langsung ambles katut toyá sentor, boten lèngkèt, boten ambet kados bahan kimia, boten raos sakit, boten mules, boten semeg/kembung, boten kathah angin, puniká pratándhá séhat.
Tipe 5 dugi 7
Bènyèk, èncèr, dugi diaré. Panjenengan kécalan kathah cairan lan zat-zat gizi, sarehning poep utawi luluhing dhaharan wau boten cekap wekdal manggèn ing usus, lajeng usus boten saget mundhut zat-zat gizi. Kathahipun kahanan puniká kasebab parasit utawi bakteri patogén ing dhaharan, intoleransi tumrap bahan dhaharan, reaksi obat, utawi strès (ngadhepi ujian, pakaryan, masalah).
Puniká pitedhah saking ‘dokter poep’ Nienke Gottenbos kersanipun usus lan flora usus saget saé séhat:
Ampun kirang ngunjuk
Ngunjuk toyá ingkang cekap. Langkung saé toyá pethak utawi tèh anyep. Ampun kathah-kathah ngunjuk kopi. Kekathahen ngunjuk kopi malah saget ndadosaken poep èncèr.
Dhahar cekap serat
Dhahar ingkang kathah ngandhut serat kados sayur-sayuran (kangkung, bayem, sawi, brokoli, kobis), woh-wohan (jambu, jeruk, blimbing, pelem, nanas, pisang), kacang-kacangan (kacang tanah, kacang ijem, kacang tálá), umbi-umbian (pohung, telá, gembili, tales, bengkoang).
Ngirangi strès
Ngéndhani strès 100% mesthi boten saget, tiyang gesang kadhanv kálá temtu ngalami strès, nanging kedah ngirangi supados boten dados kronis. Strès kronis nguras ènèrgi dateng utek lan otot, boten dugi sistem pangluluhing dhaharan.