DEN HAAG – Mendagri demisioner Karin Hildur (Kajsa) Ollongren positif ketularan virus Corona. Piyambakipun sadèrèngipun rawuh kepanggih kalih párá juru kampanye naliká rembugan njajagi mbentuk kabinet minggu kapengker.
Sarèhning kedadosan wau, rembugan njajagi mbentuk kabinet antawisipun pangajeng partai VVD ugi Perdana Menteri Mark Rutte, pangajeng D66 Sigrid Kaag, sawetawis dipuntundhá, makaten Rijksvoorlichtingsdienst.
Pitakènanipun wonten ing pundi kinten-kinten Mendagri Ollongren ketularan virus Corona? Sadèrèngipun minggu kapengker Menteri Muda Ekonomi Mona Keijzer ugi positif tès Corona. Wiwit dinten wau sedáyá menteri kabinet dipuntès. Sawetawis sampun cethá bilih PM Rutte kasilipun negatif.
Kapethik saking televisi publik NOS, Mendagri Ollongren énjing wau ketingal rawuh ing gedhong Tweede Kamer (parlemen, red). Caket mèh dipunwiwiti rapat rembugan njajagi mbentuk kabinet, piyambakipun budhal malih nilaraken Tweede Kamer.
Sesepuh partai VVD Annemarie Jorritsma ngendiká bilih rembugan kadosipun sebagéan badhé dipunlajengaken mawi digital, nanging punápá èstu makaten taksih dèrèng temtu. Dipunkersaaken sadèrèngipun bilih párá pangajeng partai dinten Slásá samangké kedah sampun ngaturaken lapuranipun, éwosemanten Jorritsma boten pati yakin.
“Kedadosan puniká temtu kémawon ndamel rembugan dados ngrendhet,” makaten Jorritsma.