DEN HAAG – Sekolah SD/Tengahan kénging paring piwulang utawi jam sekolah langkung dangu kanggé nyusul katilaran amargi Corona.
Jam sekolah langkung dangu, piwulang tambahan kanggé siswá ingkang mbetahaken, sáhá mulang ‘satunggal guru satunggal siswá’ puniká antawisipun metodhe ingkang saget dipunpilih déning sekolah SD/Tengahan kanggé nyusul katilaran.
pamréntah maringi € 8,5 milyar (Rp 144,5 trilyun) kanggé nyusul katilaran piwulangan amargi Corona
Makaten pilihan-pilihan ingkang cumawis kados dipunaturaken déning Menteri Wiyátá Arie Slob dinten Senèn (10/5/2021).
Sadèrèngipun kabinèt sampun netepaken ing wiwitan taun 2021 puniká bilih pamréntah badhé maringi € 8,5 milyar (Rp 144,5 trilyun) kanggé nyusul katilaran piwulang párá siswá amargi krisis Corona.
Saking artá wau kathahipun € 6 milyar (Rp 102 trilyun) kanggé sekolah SD lan Tengahan. Mawi menu ingkang dipunsungsun déning párá guru, organisasi wiyátá, sáhá párá ilmuwan, investasi kanggé piwulangan saget kongkrit dipungarap.
Sapuniká gumantung kalih sekolah kanggé netepaken karsá tumindak taun ngajeng, ingkang mawi karsá puniká sekolah-sekolah saget milih pranatan saking daftar wau. Saben-saben pilihan wonten seratan pinten biayanipun saben siswá lan punápá mathuk kalih pangajenganipun. Sekolah bakal pikantuk paling kirang € 700 per siswá.
Sekolah-sekolah ingkang katilaran nemen saget pikantuk anggaran langkung kathah. Kartu menu kasebat wau sampun cumawis online lan minggu-minggu mbénjing taksih badhé terus dipunrampungaken. Ugi bakal dipunparingi pawigatosan tambahan tumrap kahanan méntal párá siswá. (es/es)