DEN HAAG – Mentri Yustisi demisionèr Ferd Grapperhaus dhawuh dumateng párá walikuthá supados ènggal ndamel 800 panggènan kanggé pangungsi Afghanistan.
Lajeng ing minggu-minggu samangké kedah dipuntambah 1.500 malih, sarèhning kabutuhanipun kathah sanget, makaten Kamentrian Yustisi ngumumaken kados kapethik saking Algemeen Dagblad dinten Selásá (19/10).
Mentri Grapperhaus paring dhawuh ing Veiligheidsberaad (Rembugan Kaslametan) minongká wadhah rembugan párá walikuthá saking sedáyá wilayah.
Masalahipun miturut kamentrian, kathah panggènan kanggé nampi tiyang-tiyang saking Afghanistan namung kanggé jángká wekdal sakedhap mawon. Dipunbetahaken panggènan ing mriku tiyang-tiyang wau saget manggèn langkung dangu, utaminipun kanggé pangungsi laré alit ingkang mlajar dugi tanah Walandi tanpá kaluargi.
Sapuniká ingkang mèpèt dipunbetahaken wonten 800 panggénan tambahan, lajeng 1.500 malih ingkang kedah saget dipunanggèni salebeting étangan wekdal pinten-pinten minggu. Ingkang kasebat pungkasan puniká ugi kedah kanggé jángká wekdal dangu,” makaten kamentrian Yustisi.
Sapuniká totalipun taksih dipunpadosi 11.000 panggènan malih kanggé párá pangungsi, namung saèstunipun tiyang-tiyang wau kedah sampun pikantuk pondokan.
Walikuthá Nijmegen ugi pangarsá wadhah Rembugan Kaslametan Hubert Bruls ngendiká bilih párá walikuthá saget pirsá masalah ingkang dipunsebataken déning Mentri Grapperhaus.
“Kitá ndhèrèk menggalih sáhá ndamel prajanjian antawis párá walikuthá babagan perkawis wau saénggá salebeting wekdal 2 dugi 3 minggu párá pangungsi boten numpuk saget dipunsebar ing panggènanipun. Kanthi makaten kitá sareng-sareng saget nampi párá pangungsi kanthi nguwongké,” ngendiká walikuthá Bruls.
Naliká pungkasan sasi Agustus, Mendagri Kajsa Ollongren sareng Sekretaris Negari Ankie Broekers-Knol ugi sampun dhawuh dumateng párá kutháprájá sáhá provinsi supados nyiapaken panggènan-panggènan kanggé párá pangungsi, nanging panggènan-panggènan boten cekap.
Sarèhning pangungsi terus mili mlebet Walandi jumlahipun sangsáyá kathah, langkung kathah saking prakiraan sadèrèngipun, sebagéan amargi kahanan ing Afghanistan, sebagéan malih pancèn saráná-prasaranipun pancèn boten kathah.
“Párá pamongprájá saking wadhah Rembugan Kaslametan sampun pirsá punápá ingkang dipunbetahaken kados dhawuhipun Pak Mentri atas nami kabinèt perkawis panggènan kanggé párá pangungsi,” makaten Bruls.