SAINT HELIER – Párá wargi ing nungsá (pulau) Jersey, Inggris wiwit dinten sapuniká saget kénging dendhá mèh Rp 200 juta menawi mlajar sasampunipun nabrak kucing.
Párá politisi ing Jersey dinten Selásá sarujuk ngamandemèn Pranatan Unggah-ungguh Margi, ingkang antawisipun ngatur bilih párá sopir utawi pangendali kendaraan sanèsipun kedah lapuran dateng ingkang kagungan kucing utawi kantor Jersey Society for the Prevention of Cruelty to Animals utawi pulisi menawi piyambakipun nabrak kucing.
Menawi boten nindakaken aturan puniká pramilá piyambakipun saget kénging dendhá dugi 10.000 poundsterling utawi Rp 194 juta, makaten Algemeen Dagblad kapethik Het Javaanse Blad, Senèn (11/10).
Naliká taun 2019 rancangan aturan puniká dipunwiwiti déning Equal Rights for Cats Group (Paguyuban Sesami Hak kanggé Kucing, red) mawi petisi online ingkang dipundukung párá wargi kathahipun langkung saking 5.000.
Paguyuban puniká menggalih bilih boten adil pamréntah sampun ngreksá kéwan sanèsipun menawi ketabrak, nanging kucing dèrèng mlebet aturan lan tansah dados korban tabrak mlajar.
“Aturan puniká saget matesi nelangsanipun kucing, supados menawi ketabrak énggal pikantuk pitulungan saking dokter kéwan,” makaten Jeremy Maçon saking Equal Rights for Cats Group.