DEN HAAG – Sinten tindak dateng Amerika mawi montor mabur lan sanès wargi Amerika utawi kagungan idin manggèn permanèn, wiwit 8 Novèmber mangké kedah nedhahaken bukti sampun jangkep pikantuk vaksin Covid-19, ugi tès PCR negatif Corona.
Kejawi inggih puniká laré-laré kirang umur, ugi tiyang-tiyang ingkang boten kénging pikantuk vaksin amargi alesan medis. Senaosá makaten golongan puniká tetep kedah tes Corona kejawi yuswanipun kirang saking 2 taun. Tès puniká kedah paling telat 24 jam sadèrèngipun tindak mabur.
Éwodènten kanggé tiyang-tiyang ingkang sampun pikantuk vaksin lan laré-laré ingkang ndhèrèk tès puniká wau saget dugi 72 jam utawi 3 dinten. Sedáyá maskapai ingkang nglayani tumpangan mabur kedah nindakaken pranatan énggal saking Gedhong Pethak (White House) puniká, antawisipun ngontrol párá penumpang punápá sampun netepi prasyarat vaksinasi wau.
Miturut pranatan, satunggaling penumpang sampun jangkep pikantuk vaksin manawi dosis pungkasan vaksin Corona wau paling kirang sampun dipunsuntikaken kalih minggu sadèrèngipun tanggal budhal mabur.
Vaksin-vaksin ingkang dipunakèni déning pamréntah Ameriká miturut pranatan wau inggih vaksin-vaksin ingkang sampun pikantuk idin saking WHO. Tegesipun penumpang nganggé vaksin kados AstraZeneca, senaosá boten dipunparingaken ing Amerika piyambak, tetep saget mabur mlebet Amerika.