DEN HAAG – Amargi pagebluk virus Corona, pamréntah Walandi paring dhawuh warginipun supados boten késahan dateng máncánegari. Ugi kosok wangsulipun boten mlebet Walandi saking máncánegari, menawi boten perlu saèstu.
Menawi badhé tindak dateng Walandi ugi wonten pranatan larangan mlebet mriki saking Uni Eropa. Dados sinten kémawon boten kénging mlebet wilayah Uni Eropa, ugi kalebet wilayah Schengen, tegesipun ugi boten saget mlebet wilayah Walandi.
Kejawi makaten ugi wonten larangan kanggé montor mabur ingkang mbetá penumpang saking Afrika Kidul, sáhá saking negari-negari Amerika Tengah lan Amerika Kidul.
Éwodéné makaten wonten golongan ingkang dipunbèntenaken nggih puniká párá sudagar, párá máhásiswá, párá migran inggil ngastá kawruh, párá profesional kabudhayan lan saking séktor kreatif, ugi jejodhoan tebih.
Sasampunipin dugi Walandi, kedah langsung quarantaine (karantina) ing griyá dangunipun 10 dinten. Mawi tès Corona dangunipun karantina saget cekak dados 5 dinten, menawi kasilipun négatif.
Tès Corona namung saget dipuntindakaken wonten ing dinten kaping 5, sarèhning wekdal antawis panularan lan medalipun gejala biasanipun wonten ing dinten kaping 5. Pramilá panjenengan kedah nenggá dugi dinten kaping 5 sadèrèngipun saget nglampahi tès, makaten pamréntah ing website resminipun Rijksoverheid.nl
Sawetawis puniká pamréntah Indonesia ugi sampun netepaken nutup tapel wates kanggé nyegah mlebetipun tiyang saking máncánegari, kejawi golongan katemtu ingkang saget dipunbèntenaken.