MADRID – NATO ngadhepi kasunyatan jaman, antawisipun ancaman Rusia. Kabinèt Walandi bakal nambah anggaran angkatan perang 2% supados mathuk kalihan norma NATO.
PM Mark Rutte ngendiká makaten naliká ngrawuhi KTT NATO ing Madrid, mawi NPO Radio 1, dinten Kemis suryá kaping 30 Juni 2022.
“Kitá kedah nambah blánjá angkatan perang, dados kanthi makaten saget netepi norma NATO ingkang 2% ing tahun 2024-2025,” ngendiká Rutte.
Rutte nglajengaken, manawi ékonomi mangké tansah tuwuh, prosèntase wau bakal mandhap malih. Pokokipun kedah wonten langkung kathah anggaran kanggé angkatan perang.
“Nanging puniká formil taksih kedah dipunputusaken déning kabinèt. Kulá kinten politis boten badhé wonten masalah,” makaten Rutte.
KTT Boten Biasa
NATO ngadhepi jaman, miturut Rutte, KTT NATO puniká kalebet KTT boten biasa ingkang piyambakipun naté rawuhi minongká Perdana Menteri Walandi.
“Menawi kulá ènget-ènget malih tahun-tahun ingkang kapungkur, saget kulá tarik konklusi bilih KTT puniká boten biasa,” ngendiká Rutte.
Paling wigatos inggih puniká pangiyatan aliansi, sarèhning wonten ancaman saking Rusia. Salajengipun mbangun tapel wates sisih wétan ugi kalebet historis.
Boten kalah wigatos inggih puniká Swedia lan Finlandia mlebet NATO. Sadèrèngipun nagari kekalih ing wilayah Skandinavia wau tansah milih netral.
“200 tahun kapungkur Swedia tansah nétral, nedhahaken bilih wekdal kitá gesang sapuniká boten biasa,” makaten Rutte.
Kanggé Kamardikan
Prioritas wekdal sapuniká miturut Mark Rutte inggih puniká tetep ngintun gaman dumateng Ukraina, kados sampun dipunaturaken naliká pidato ing KTT NATO.
“Kitá temtu boten saget ngintun pasukan dateng Ukraina, amargi kitá boten ndèrèk perang, nanging kitá kedah sareng-sareng tetep ngintun gaman,” imbuh Rutte.
Perkawis makaten Rutte sampun ngendikan sareng presidèn Ukraina Zelenski sáhá Perdana Menteri Inggris Boris Johnson, ugi pangarsá nagari sanèsipun kersanipun mbiyantu Ukraina.
Miturut Rutte piyambakipun boten saget nyebataken nagari-nagari pundi mawon, nanging langkung utami kawigatosan ngadhepi perang puniká.
“Kitá kedah siap rekaos, antawisipun regi-regi awis lan inflasi. Sedáyá wau kedah kitá bayar kanggé kamardikan lan kabébasan sadangunipun,” makaten Rutte. (es/es)