ROTTERDAM – Ngarsá Dalem Rájá Willem-Alexander karsá angresmiaken Depot Boijmans Van Beuningen ing Rotterdam, dinten Jemuah (5/11) siang.
Puniká depot seni kaping sepindhah sajagad ingkang saget dipuntuwi déning masyarakat, makaten serat pawartá Rijksvoorlichtingsdienst ingkang dipuntampi Het Javaanse Blad.
Museum Boijmans Van Beuningen sapuniká tutup sarèhning wonten pangénggalan sáhá dandosan (rénovasi) ageng lan dipunkarsaaken badhé bika malih mangké taun 2028.
Depot seni ing gudhang museum boten aman, kebak sanget lan sampun lawas. Pramilá barang-barang seni wau dipunpindhahaken dateng depot njawi sadèrèngipun museum tutup taun 2019. Kasunyatanipun sanès pilihan menawi kolèksi 151.000 barang seni ingkang awis wau dipunsimpen malih ing museum, dados salajengipun dipunsimpen ing depot njawi.
Depot Boijmans Van Beuningen ngaturi párá rawuh ingkang tuwi mriká paningalan jagad muséum lan maringi pirsá pripun caranipun ngrumat sáhá nguri-uri kolèksi barang seni. Sedáyá pakaryan seni dipunsimpen saget dipunpirsani párá pangunjung. Biasanipun muséum namung mameraken 6% dugi 10% saking kolèksinipun.
Depot puniká dipunrancang déning kantor arsitèk MVRDV ugi satunggaling gedhong ingkang lestari, ingkang ngginaaken ènèrgi suryá lan panyimpanan toyá. Sisih njawi depot puniká kadamel saking 1664 panèl pangilon ingkang nggambaraken muséum sáhá kuthá Rotterdam.
Sasampunipun Ngarsá Dalem angresmiaken depot, salajengipun rombongan pangunjung ingkang kaping sepindhah saget mlebet depot sáhá mirsani kolèksinipun. Ngarsá Dalem salajengipun dipundhèrèkaken keliling depot, antawisipun panggènan ukiran kajeng, lukisan, panggènan rèstorasi, panggènan sinau, lan kolèksi partikelir. Ngarsá dalem ugi guneman kaliyan párá punggáwá Boijmans Van Beuningen, párá arsitèk depot sáhá panganggé depot sanèsipun.