DEN HAAG – Ngarsá Dalem Willem-Alexander badhé nampi seerat-serat piandel Dutá Ageng Thailand Chatri Archjananun wonten ing Kraton Noordeinde, Den Haag, mangké dinten Rebo (21/4/2021) énjing.
Makaten serat pawartá saking Rijksvoorlichtingsdienst/Koninklijk Huis ingkang dipuntampi Het Javaanse Blad sapuniká.
Kejawi Dutá Ageng Thailand, wonten ing dinten ingkang sami Ngarsá Dalem ugi kersá nampi serat-serat piandel saking Dutá Ageng Republik Sosialistis Sri Lanka Aruni Ranaraja, sáhá Dutá Ageng Republik Tunisia Slim Ghariani.
Salebeting upácárá ngaturaken serat-serat piandel wau protokol kanggé nanggulangi virus Corona ugi dipuntrapaken kanthi temen: párá Dutá Ageng rawuh saking wingking kraton nitih mobil.
Éwádéné upácárá militeripun ugi dipuncocogaken kaliyan kahanan pagebluk Corona. Lajeng serat-serat piandel boten langsung dipunaturaken dumateng Ngarsá Dalem, nanging déning párá Dutá Ageng dipunsèlèhaken ing satunggaling méjá.
