DEN HAAG – Ngarsá Dalem Willem-Alexander badhé kersá nampi serat piandel Dutá Ageng Filipina lan Kolombia dinten Rebo (7/4/2021).
Ngarsá Dalem kersá nampi serat piandel ingkang dipunaturaken dèning Dutá Agung Filipina José Eduardo Malaya sáhá Dutá Ageng Kolombia Fernando Antonio Grillo Rubiano ing Kraton Noordeinde Den Haag. Kanthi dipuntampinipun serat piandel puniká párá Dutá Ageng wau resmi miwiti tugasipun ing tanah Walandi.
Sadangunipun upácárá serat piandel protokol kanggé nanggulangi virus Corona dipuntrapaken kanthi temen, antawisipun párá Dutá Ageng rawuh mlebet saking wingking Kraton Noordeinde nitih mobil, boten saking ngajeng nitih krétá kados biasanipun.
Sawetárá upácárá militèr ugi dipuncocogaken kalih kahanan pagebluk Corona. Éwodéné serat piandel boten dipunaturaken langsung dumateng Ngarsà Dalem, nanging dèning párá Dutá Ageng wau dipunsèlèhaken ing mèjá.
