AMSTERDAM – Ngarsá Dalem Rájá Willem-Alexander badhé mbika paméran Slavernij (Batur Tukon, red) ing Rijksmuseum, Amsterdam, mangké dinten Selásá siang (18/5/2021).
Sarèhning wonten pranatan kanggé nanggulangi COVID-19, pramilá pamèran wau sawetawis ing minggu-minggu kaping sepindhah mligi kanggé sekolah-sekolah lajengan saking wilayah Amsterdam mawon. Menawi sampun aman, salajengipun saget dipunbika kanggé kawulá umum, makaten katerangan Rijksvoorlichtingsdienst ingkang dipuntampi Het Javaanse Blad.
batur tukon kolonial Walandi ing Afrika Kidul lan Asia mawi Verenigde Oost Indische Compagnie (VOC)
Senaosá makaten, pamèran batur tukon wau saget dipunpirsani mawi online wiwit tanggal 18/5. Miturut cariyos 10 sumber, pamèran puniká nyoroti batur tukon naliká jaman kolonial Walandi ingkang dangunipun saking abad kaping 17 dugi abad 19.
ing pamèran puniká saget dipunpirsani barang-barang, lukisan, sáhá arsip-arsip lángká
Wonten ing pamèran wau, cariyos pengalaman piyambak ingkang yektos kadadosan saking 10 tiyang ingkang gesang wekdal semanten dados wigatosan utami. Puniká cariyos babagan gesang párá batur tukon, caranipun meres, lajeng nglawan lan pungkasanipun bébas mardhiká.
Batur tukon ing Suriname, Brazil, sáhá wilayah Karibia, kanthi lakonipun West-Indische Compagnie (WIC), sáhá batur tukon kolonial Walandi ing Afrika Kidul lan Asia ing pundi Verenigde Oost Indische Compagnie (VOC) wekdal semanten taksih wonten, dipunpamèraken.
Rijksmuseum mawi pamèran puniká ugi mbabaraken akibat-akibat saking tátácárá jaman semanten ing nagari Walandi piyambak. Ing pamèran wau saget dipunpirsani barang-barang, lukisan, sáhá arsip-arsip lángká, ugi sumber-sumber saking pitutur, tembang, lan tetabuhan utawi musik.
Ngarsá Dalem dipunaturi mirsani keliling pamèran, dipundhèrèkaken déning Dirèktur Rijksmuseum Taco Dibbits, Kepala Sejarah Valika Smeulders lan Yosina Roemajauw (14), inggih puniká laré ingkang dados panutur, ndhèrèk nyerat ing majalah Slavernij en Nu? (Batur Tukon lan Sapuniká?) ingkang dipundamel mligi kanggé piwulang.
Sadangunipun mirsani keliling piyambakipun sareng kaliyan párá konservator nerangaken pinten-pinten cariyos. Ing bangsal “Look At Me Now” Ngarsá Dalem ngendiká kaliyan párá mahasiswa ingkang damel prakaryan seni énggal babagan batur tukon ingkang dipuntuntun déning párá seniman Instituto Buena Bista saking Curaçao.
Pamèran batur tukon puniká minongká kasilipun makaryá sami antawisipun pinten-pinten ahli saking njawi museum, antawisipun párá sejarawan, ahli warisan kabudhayan, pangusaha kabudhayan, seniman, pandamel tonil, sáhá párá artis.(es/es)
