DEN HAAG – Ngarsá Dalem Rájá Willem-Alexander nampi panyerahan serat-serat kapitadosan saking Dutá Ageng Israël Modi Ephraim.
Salajengipun ugi Dutá Ageng Selandia Énggal Susannah Hayden Gordon sáhá Dutá Ageng Yunani Caterina Ghini. Panyerahan serat-serat kapitadosan utawi credential (kredensial) puniká dipunselenggaraaken wonten ing Karaton Noordeinde, Den Haag, dinten Rebo (2/2/2022).
Párá Dutá Ageng dipunpethuk lajeng dipundèrèkaken déning kamerheer inggih puniká satunggaling pangageng kraton staf Ngarsá Dalem. Kanggé misi puniká Ngarsá Dalem dhawuh sedyá karétá turánggá kanggé párá Dutá Ageng, lan menawi mathuk, ugi blauw rijtuig kanggé párá staf Dutá Ageng ingkang ndèrèkaken minongká pangiring.
Karétá puniká dipuntarik nganggé 2 turánggá, éwodènten galarijtuig dipunkawal ing kiwá tengen déning 2 panunggang turánggá ngagem busáná seragam gala. Ing ngajeng sáhá ing wingking iring-iringan Dutá Ageng puniká dipuniringaken déning 2 kavaleri saking Bereden Marechaussee ngagem busáná seragam upácárá. Protokol busáná kanggé Dutá Ageng inggih puniká jacquet utawi ugi saget nganggé busáná nasional piyambak miturut negarinipun.
Salajengipun dugi ing wingking Karaton Noordeinde sampun nenggá pasukan jagi sáhá militaire kapel utawi korps musik militèr. Pasukan jagi péranganipun inggih puniká satunggal komandan lan 2 detasemèn saking Commando Zeestrijdkrachten (Komando Angkatan Laut). Éwodènten militaire kapel ingkang ngiringaken musik saking Marinierskapel der Koninklijke Marine & Tamboers en Pijpers.
Wonten ing Karaton ugi sampun siap prajurit jagi saking Koninklijke Marechaussee nganggé seragam upácárá. Sasampunipun ngaturaken hormat mawi 4 roffels lan lagu kebangsaan negarinipun Dutá Ageng, dipunsusul inspèksi pasukan jagi, Dutá Ageng kaliyan pandampingipun lajeng mlebet Karaton. Sasampunipun kredensial, menawi Dutá Ageng budhal nilaraken Karaton, piyambakipun ugi pikantuk atur kinurmatan malih mawi 4 roffels.
Dutá Ageng ngaturaken serat-serat kapitadosan dumateng Ngarsá Dalem miturut paugeran pananggulangan virus Corona, upácárá militeripun ugi dipuncocogaken kaliyan kahanan. Serat-serat kapitadosan boten langsung dipunaturaken dumateng Ngarsá Dalem, nanging dipunsèlèhaken déning Dutá Ageng ing méjá.