DEN HAAG – Ngarsá Dalem Rájá Willem-Alexander karsá badhé nampi Bondsraadvoorzitter (Pangarsá Parlemèn Federal Jerman, red) tuwan Reiner Haseloff dinten Rebo bénjing.
Makaten serat pawartá saking Rijksvoorlichtingsdienst ingkang dipuntampi Het Javaanse Blad dinten sapuniká, Selásá (26/10).
sampun dados tradisi saben taun
Rijksvoorlichtingsdienst
Ngarsá Dalem karsá nampi Pangarsá Parlemèn Federal Jerman Haseloff sareng audiènsi wanci siang wonten ing Paleis Noordeinde (Kraton Noordeinde), Den Haag. Salajengipun Wakil Perdana Menteri De Jonge badhé nampi piyambakipun wonten ing Kamentrian Kaséhatan minongká guneman bilateral.
Wiwit taun 2000 ingkang kapungkur sampun dados tradisi saben taun Pangarsá Parlemen Federal Jerman rawuh imbal balik dateng Walandi, makaten Rijksvoorlichtingsdienst.
Profil
Reiner Haseloff (lahir 19 Februari 1954) puniká politikus Jerman ingkang jumeneng minongká Perdana Menteri Nagari Bagéan Saxony-Anhalt. Tanggal 9 Oktober 2020 piyambakipun kadhapuk dados Bondsraadvoorzitter (Pangarsá Parlemèn Federal Jerman), makaten Mitteldeutsche Zeitung (9/10/2020).
Sadèrèngipun saking 2002 dugi 2006, Haseloff naté dados Mentri Anóm ing Kamentrian Ékonomi lan Pakaryan ingkang dipunpimpin déning Mentri Horst Rehberger naliká kabinèt Perdana Menteri Wolfgang Böhmer ingkang kaping sepindhah.
Salajengipun taun 2006 piyambakipun nggantosi Rehberger lan dados anggota kabinèt Böhmer ingkang kaping kalih. Naliká rembugan damel pamréntahan koalisi antawis Kristen Démokrat (CDU sareng kaliyan CSU) lan Partai Demokratis Mardhiká (FDP) sasampunipun pemilu federal taun 2009, Haseloff dados bagéan delegasi CDU/CSU ngastá urusan pakaryan lan sosial, ingkang dipunpimpin pangarsá delegasi Ronald Pofalla lan Dirk Niebel.