AMSTERDAM – Ngarsá Dalem Willem-Alexander sareng Gusti Kanjeng Ratu Máxima ngaturi galadiner dumateng Corps Diplomatique ing Kraton Amsterdam mangké dinten Rebo dalu suryá kaping 22 Juni.
Sadangunipun galadiner Ngarsá Dalem badhé paring pidato, kados sampun dados tradisi. Taun puniká irah-irahanipun babagan politik sáhá pamréntahan.
galadiner = pasamuan ageng
Galadiner puniká minongká kanggé nguri-uri lan ngiataken gegayutan internasional tuwin nggathukaken párá tamu saking Walandi piyambak lan saking máncá.
Kejawi 150 perwakilan saking máncá ing Walandi lan Brussel, ugi wonten 100 wakil pamréntahan saking Walandi piyambak ingkang dipunaturi rawuh.
Galadiner tahun-tahun kapungkur antawisipun ngaturaken irah-irahan ing babagan seni lan kabudayan, hukum internasional sáhá perusahaan internasional.
Saking kaluargi kraton ingkang badhé rawuh mangké antawisipun Gusti Kanjeng Putri Beatrix, Putri Margriet sáhá garwanipun inggih puniká Prof. mr. Pieter van Vollenhoven.
Sampun langkung saking 200 taun Kraton Amsterdam dados salah satunggaling résidènsi pangarsá Karajan Walandi. Kraton Amsterdam puniká ugi kraton kanggé nampi tamu-tamu resmi.
Antawisipun tuwi resmi kanegaran, resèpsi taun énggal, ugi kanggé nampi tamu-tamu resmi kraton sanèsipun. Naliká tuwi resmi kanegaran, Ngarsá Dalem ngaturi pasegahan ing Kraton Amsterdam puniká. (es/es)