AMSTERDAM – Ngarsá Dalem sáhá Gusti Kanjeng Putri Beatrix der Nederlanden sami ngrawuhi Nederlands Balletgala kaping 23 déning Stichting Dansersfonds ‘79 (Yayasan Bándhá Panantun ‘79) wonten ing gedhong DeLaMar, Amsterdam, dinten Senèn dalu utawi Selásá (16/11) WIB.
Nederlands Balletgala tahun sapuniká dipunaturaken dateng sedáyá panantun Walandi sáhá párá panantun ingkang makaryá ing Walandi, ingkang ngalami kasisahan anggènipun latihan utawi nantun sarèhning wonten krisis Corona.
Naliká Balletgala wonten antawisipun pasugatan saking Het Nationale Ballet, de Junior Company saking Het Nationale Ballet, Nederlands Dans Theater, Introdans, Scapino Ballet Rotterdam lan Conny Janssen Danst.
Ugi sadangunipun gala dipunaturaken ganjaran kanggé párá panantun ingkang nggadhahi bakat lan ganjaran minongká pangurmatan kanggé panantun utawi koreograf ingkang sampun kathah jasanipun, makaten serat pawartá saking Rijksvoorlichtingsdienst ingkang dipuntampi Het Javaanse Blad.
Yayasan Bándhá Panantun ‘79 dipunawontenaken kanggé mbiyantu finansial párá panantun ingkang kapeksá mandheg makaryá amargi masalah yuswá utawi cidrá nemen, sáhá kanggé ndorong lan mbiyantu panantun enèm.
Kanthi makaten yayasan puniká saget maringi beásiswá dumateng párá taruná ingkang nggadhahi bakat kanggé ngranjuk tingkat internasional ingkang inggil. Salah satunggalipun saráná kanggé nggalang artá inggih puniká mawi Balletgala.
Sasampunipun lèngsèr kaprabon Gusti Kanjeng Ratu Beatrix (83), ibunipun Ngarsá Dalem, kados kang ibu Ratu Juliana sáhá éyang Ratu Wilhelmina ngastá titel Prinses der Nederlanden, Prinses van Oranje-Nassau lan Prinses van Lippe-Biesterfeld kanthi predikat Koninklijke Hoogheid.
Ratu Beatrix lèngsèr kaprabon dinten Selásá, 30 April 2013. Makutá Karajan Walandi dipunlajengaken déning kang putrá Pangéran Pati Willem-Alexander Claus George Ferdinand Prins van Oranje-Nassau, Jonkheer van Amsberg (Utrecht, 27 April 1967) ingkang salajengipun wiwit 30 April 2013 resmi ngastá titel ‘Ngarsá Dalem’ Koning der Nederlanden.
Wiwit 4 Februari 2014 Gusti Kanjeng Putri Beatrix gegriyan resmi ing Kasteel Drakensteyn. Gedhong sisih Kraton Noordeinde ing margi Noordeinde 66 Den Haag wiwit tahun 2014 dados pied-à-terre kanggé piyambakipun, ugi minongká sekretariat piyambakipun.
Gusti Kanjeng Putri Beatrix jumenengan dados Ratu dinten Rebo, 30 April 1980, nglajengaken makutá Karajan Walandi saking kang ibu Gusti Kanjeng Ratu Juliana der Nederlanden. Beatrix puniká Putri Pati saking prakawinan Gusti Kanjeng Ratu Juliana lan Pangèran Bernhard van Lippe-Biesterfeld.
Juliana kapundhut dinten Setu, 20 Maret 2004, lajeng Pangèran Bernhard dinten Rebo, 1 Desèmber 2004. Kekalihipun dipunsaréaken ing Pasaréan Trah Oranje ing Nieuw Kerk (Gréja Énggal), Delft.