AMSTERDAM – Ngarsá Dalem Willem-Alexander ngrawuhi riyáyá 60 tahun The American Chamber of Commerce (Kamar Dagang Amérika) ing Tanah Walandi (AmCham).
Ugi rawuh Pangarsá Sénat Walandi Jan Anthonie Bruijn, Menteri Ékonomi Micky Adriaansens, Staatssecretaris Fiskal lan Pajek Marnix van Rij, Chargé d’Affaires a.i Kedubes AS Marja Verloop, 550 anggota lan tamu sanèsipun.
Sadèrèngipun, Ngarsá Dalem salebeting riyáyá ing Theater Amsterdam (25/5) wau ugi ngendikan kaliyan párá punggáwá AmCham, makaten serat pawartá Rijksvoorlichtingsdienst ingkang dipuntampi Het Javaanse Blad.
Kamar dagang Amerika ing Walandi mangadeg wiwit taun 1962 kanthi anggota 94 perusahaan Walandi lan Amerika. Sebagéan perusahaan wau sampun boten wonten malih, sebagéan sanèsipun nglajengaken lakon wigatos salebeting jejaring AmCham.
Ing wekdal-wekdal kapungkur AmCham kanthi bingah nampi anggota generasi énggal. Sedáyá anggota lawas lan énggal puniká ndadosaken AmCham organisasi ingkang gairah. Dinten sapuniká AmCham nggadhahi 340 anggota saking sedáyá sèktor ékonomi.
Sadangunipun 60 taun, AmCham tansah makaryá ngiataken iklim invèstasi. Ngadhepi 60 taun majeng, AmCham ugi sampun miyaraken skup agèndanipun, sarèhning anggotá mbetahaken makaryá sareng ing masalah-masalah énggal.
Kados tuladhanipun masalah kalestarian, bebrayan, inovasi, sáhá makaryá sareng antawis perusahaan multinasional ageng kaliyan Perusahaan-perusahaan Alit lan Tengahan.
Sedáyá wau dados kawigatosan utami naliká gelar gunem ‘Imagine 60 Years Up’ sareng Marguerite Soeteman-Reijnen (dirèktur Aon Holdings), Monique Donders (country manager BlackRock ing Walandi), Wouter Kolk (CEO Ahold Delhaize Eropa & Indonesia) miwah Martijn Bertisen (country director Google ing Walandi).
AmCham ngaturaken matur nuwun kanthi sanget dumateng Aon, BlackRock, Ahold Delhaize, Google, sedáyá anggota sáhá párá tamu ingkang sampun ndadosaken Prèngetan 60 Taun puniká bakal tansah dipunènget-ènget!