VALKENBURG – Ngarsá Dalem Rájá Willem-Alexander tanpá wárá-wárá rawuh ing Valkenburg, mlebet wandé dhahar bacon kaliyan tigan, lajeng mbayar piyambak.
Ngarsá Dalem dipunambit Gusti Kanjeng Ratu Máxima ngagètaken rawuh tuwi tanpá wárá-wárá dateng kutháprájá Valkenburg ingkang katerjang banjir taun kapungkur.
Piyambakipun kekalih antawisipun pinarak ing toko ès krim Botterweck kagunganipun Ferry Philippi, ingkang nembé bika malih sasampuniun rampung dipundandani.
“Inggih leres, Ngarsá Dalem sareng Gusti Kanjeng Ratu pinarak mriki. Puniká kulá taksih degdegan sanget,” ngendiká Philippi sasampunipun Rájá Willem-Alexander nilaraken panggènan kados kapethik saking Hart van Nederland dinten Ngahad (29/5/2022).
Sadèrèngipun Philippi pikantuk telepon réservasi saking kutháprájá punápá piyambakipun saget nyiapaken méjá kanggé Walikuthá Valkenburg Daan Prevoo dinten Ngahad jam 12.00.
Persis jam 12.00 Pak Walikuthá mlebet toko. Philippi kaget boten kinten-kinten sarèhning wonten 2 tamu ageng ndèrèk mlebet inggih puniká Rájá Walandi sareng Gusti Kanjeng Ratu.
“Mbingahaken sanget. Piyambakipun ngendiká bilih rawuh mriki kanggé netepi janji, lajeng takèn pripun kabaripun sasampunipun banjir lan pripun asuransinipun,” makaten Philippi.
Walikuthá Prevoo dhahar roti bakar, Rájá Willem-Alexander dhahar daging bacon kaliyan tigan, lajeng Gusti Kanjeng Ratu dhahar salad vegan (dhaharan tanpá bahan saking kéwan, red).
Ingkang ngagètaken malih, miturut Philippi, Ngarsá Dalem mbayar piyambak sedáyá tagihan ingkang dipundhahar. “Piyambakipun ugi maringi tip kathah,” makaten Philippi.
Dredheg
Kejawi toko ès krim Botterweck, Rájá Willem-Alexander sareng Gusti Kanjeng Ratu ugi pinarak dateng toko sekar Joy Flowers kagunganipun Joris Ruland.
Miturut Ruland, Ngarsá Dalem sampun sejam kapungkur nilaraken panggènan, nanging piyambakipun sapuniká nembé ndredheg, nembé sadar punápá ingkang sampun dipunalami.
“Naliká piyambakipun mlebet toko kulá, kulá dèrèng pati sadar, nanging sapuniká kulá nembé nyadari,” makaten Ruland.
Banjir
Wilayah kutháprájá Valkenburg aan de Geul, provinsi Limburg, Juli 2021 kapungkur katerjang banjir sasampunipun jawoh deres.
Rájá Willem-Alexander sareng Gusti Kanjeng Ratu Máxima wekdal semanten langsung tuwi mriká kanggé mirsani piyambak kados pundi risakipun wilayah wau.
Banjir puniká ugi ndadosaken karisakan nemen ing wilayah Belgia, Jerman, Prancis, lan Luxemburg, nelasaken biaya ngantos €38 euro utawi Rp 589 trilyun. Total ingkang pejah 240 tiyang (es/es).