SINT JANSKLOOSTER – Ngarsá Dalem Willem-Alexander karsá tuwi kriyá 2 kabudidayan tani ing Kop van Overijssel minongká migatosaken patanèn lan ngrumat alam.
Ngarsá Dalem keliling mirsani kabudidayan tani lan glagah Slot ing Sint Jansklooster. Kabudidayan kaluargi puniká mligi ngupákárá susu peres, glagah kanggé payon, lan ngrumat alam. Kalenggahan kabudidayan puniká wewatesan kaliyan wilayah alam De Wieden. Sapi-sapi dipungiring nyebrang nganggé prau tambang supados saget nyuket mriká. Kanthi cárá makaten rupi-rupi makhluk hayati saget dipundorong manak-pinak.
Sasampunipun keliling mirsani, Ngarsá Dalem dhawuh dumateng párá rawuh, antawisipun pripun caranipun madosi kaseimbangan antawis ngabudidáyá tani sáhá madosi bathi lan ngrumat kalestarian alam.
Saking Sint Jansklooster, Ngarsá Dalem ugi tuwi kriyá dateng kabudidayan tani Weidevol kagunganipun kaluargi Spans ing Zwartsluis. Ngarsá Dalem dipunaturi keliling mirsani kandhang lembu, sáhá panggènan kanggé rapat ingkang dipunséwaaken.
Kaluargi Spans ngaturaken katerangan pripun piyambakipun saking kabudidayan tani kados umumipun gantos tani biologis lan pripun piyambakipun nyambi dados juragan séwá panggénan.
Minongká panutup, Ngarsá Dalem ugi karsá ngrawuhi rembugan mejá bunder babagan gotong royong ing séktor tani lan ngrumat alam lingkungan tingkat propinsi. Ugi dipunrembug lakon organisasi Samen ingkang damel kabudidayan tani lestari langkung saé ing wilayah propinsi Overijssel. Organisasi puniká dipundamel déning propinsi kaliyan 13 organisasi tani lan organisasi pangrumatan alam.