DEN HAAG – Ngarsá Dalem Rájá Willem-Alexander kersá tilik kriyá dhateng Inspecteur-Generaal der Krijgsmacht/IGK (Inspektur Jenderal Angkatan Perang, red) ing Landgoed de Zwaluwenberg, Hilversum, Jemuah (5/3/2021).
“Dampakipun krisis Corona tumrap pakaryan wonten ing Kementerian Pertahanan dados guneman utami,” makaten serat pawartá Rijksvoorlichtingsdienst ingkang dipuntampi Het Javaanse Blad, Jemuah (5/3/2021).
IGK tugasipun ngaturi rembug dumateng Menteri Pertahanan perkawis urusan ing dalem kementerian sáhá pangetrapanipun. Kanggé tugas makaten IGK antawisipun numindakaken tilik kriyá lan niti priksá. Kejawi makaten IGK ugi nengahi antawis militer lan staf sipil ingkang pepadon ing Kementerian Pertahanan.
IGK ugi minongká Inspecteur der Reservisten en Inspecteur der Veteranen (Inspektur Angkatan Cadangan lan Inspektur Legiun Veteran, red). Tumrap párá veteran babagan rehabilitasi, dipunakèni sáhá dipunajèni déning masyarakat puniká dados pawigatosan IGK ingkang utami.
Ngarsá Dalem wonten ing IGK antawisipun kersá nampi Luitenant-Generaal der Mariniers (Letnan Jenderal Marinir) Frank van Sprang, Inspektur Kesehatan Militer Kolonel-Arts (Kolonel CKM) Mathon Heuts, lan párá staf ngrembuk perkawis pangetrapan kabijakan Kementerian Pertahanan.
Antawisipun dipunrembag pangaruhipun Corona tumrap pakaryan staf lan pimpinan ing Kementerian Pertahanan, kados makaryá saking griyá sáhá nugasaken personil pertahanan kanggé nulungi masyarakat, ugi tugas IGK minongká inspektur legiun veteran lan angkatan cadangan ugi dados bahan rembagan.
Akibat kabijakan Corona, kempal-kempal lan upacara kathah ingkang dipunbatalaken. Lajeng kathah tengárá bilih párá veteran dados kirang kompak lan kirang kekancan utawi malah ngraosaken kasepèn. Pasukan cadangan ugi pikantuk akibat kirang langkung sami. Kathah kekarepan ingkang boten saget kalaksanan, lajeng pasukan cadangan puniká dipuntugasaken mbiyantu organisasi darurat.
Ngarsá Dalem sáhá Gusti Kanjeng Ratu Maxima ugi ngendiká mawi telepon lan video-wicárá sadangunipun tilik kriyá kalih sinten-sinten ingkang kawogan babagan akibat krisis Corona lan tumandangipun sedáyá pihak kanggé nanggulangi pagebluk. Sadangunipun tilik kriyá pangetrapan protokol keséhatan kanggé nanggulangi virus Corona dipuntindakaken kanthi temen.(es)
