DEN HELDER – Ngarsá Dalem Rájá Willem Alexander tilik kriyá dateng Admiraliteitsraad (Déwan Amral) lan pangkalan latihan Koninklijke Marine (Angkatan Laut Karajan Walandi) ing Den Helder, dinten Rebo (19/5/2021) siang.
Tilik kriyá Ngarsá Dalem dipunwiwiti ing kapal perang Zr.Ms. Rotterdam, satunggaling kapal angkut amfibi Koninklijke Marine ing pangkalan Den Helder, makaten serat pawartá Rijksvoorlichtingsdienst ingkang dipuntampi Het Javaanse Blad.
Ngarsá Dalem antawisipun ngrawuhi sebagéan rembugan Admiraliteitsraad (Déwan Amral). Déwan puniká organ panemtu kaputusan sáhá arahan paling inggil angkatan laut Walandi langsung ing pangarsaning Panglima Angkatan Laut, Wakil Amral Rob Kramer.
Salajengipun Ngarsá Dalem tilik pangkalan latihan angkatan laut Zeemanschapstrainer de Poolster, satunggaling latihan ing pundi piwulangan nautika dipunparingaken tanpá gumantung kalih pasukan ingkang lelayaran lan saráná latihan.
Koninklijke Marine mawi armada lan pasukanipun ndhèrèk ngupáyá mujudaken katentreman donyá saking laut. Ing tanah Walandi sáhá máncánagari Koninklijke Marine mbiyantu operasi-operasi pangandalian krisis, operasi kamanungsan, lan bencáná.
Koninklijke Marine puniká bagéan paling wiwitan angkatan perang Walandi. Ngarsá Dalem kanthi teratur nindakaken rembugan babagan rupi-rupi masalah lan téma, mawi telepon, ing kraton lan panggénan sanèsipun. (es/es)
