Ngarsá Dalem Tuwi Kanegaran ing Norwegia

OSLO – Ngarsá Dalem tuwi kanegaran sareng Gusti Kanjeng Ratu Máxima dateng Karajan Norwegia, dipunaturi déning Ngarsá Dalem Rájá Harald V.

Mentri Ben Knapen ndèrèkaken tuwi kanegaran saking dinten Selásá suryá kaping 9 dugi Kemis suryá kaping 11 puniká ing Kraton Oslo sáhá Trondheim.

Tuwi kanegaran puniká minongká ngiataken gegayutan antawis Walandi-Norwegia, ingkang ngugemi norma lan unggah-ungguh ingkang sami, sáhá sesarengan ngadhepi tantangan-tantangan ageng internasional.

Bilateral

Sadangunipun tuwi kanegaran puniká dipunrembag antawisipun babagan gotong-royong bilateral lan internasional, pangowahaning iklim, pangalihan energi lan kalestarèn.

Walandi-Norwegia nggatosaken sanget perkawis nagari adedasar pranatan, ing mriku hak-hak asasi manungsá dipunmuliaaken, ugi ékonomi pasar ingkang mardiká.

Minongká sesami mitrá, Walandi lan Norwegia ugi asring tumindak sareng-sareng ing PBB, WTO, sáhá NATO.

Kanggé karaharjan generasi mbénjing, Walandi-Norwegia makaryá sareng ing babagan inovasi tuwin kalestarèn Laut Lèr, pangan, sáhá téknologi mawi sumber ènèrgi resik lan lestari.

Tuwi kanegaran puniká dipunwiwiti ing Oslo. Ngarsá Dalem sáhá Gusti Kanjeng Ratu dipuntampi déning Rájá Harald V sáhá Ratu Sonja mawi upácárá ing Kraton Oslo. 

Dipunlajengaken Ngarsá Dalem nyekar ing Monumèn Nasional minongká mrèngeti párá korban ingkang gugur sadangunipun Perang Donyá II, lajeng pasamuan siang ing Kraton.

Owahing Iklim

Wekdal siangipun ngrembag owahing iklim. Ing Arktik owahipun iklim puniká katingal sanget arupi massa ès ingkang susut, lajeng mengaruhi kagesangan sáhá ékonomi. 

Norwegia nindakaken rembagan kaliyan párá kawulá Sami ing wilayah mriku lan párá taruná babagan raos kuatos, gagasan, tuwin kamungkinan-kamungkinan énggal ing Arktik.

Éwodènten ing The Fram Museum wonten rembagan párá taruná lan mahasiswa Walandi-Norwegia babagan pengaruh owahing iklim tumrap wilayah Arktik.

Dalunipun Ngarsá Dalem Rájá Harald V ngaturi pasamuan ageng dumateng Rájá Willem-Alexander sáhá Gusti Kanjeng Ratu Máxima ing mriku kekalihipun maringi pidato.

Dinten Rebo énjingipun wonten seminar ing Pabukon Deichman, antawisipun ngrembag hak-hak manungsá sáhá kamardikan ngendikan. Ngarsá Dalem ngrawuhi seminar puniká.

Saking pabukon Ngarsá Dalem dipuntampi déning PM Jonas Gahr Støre, salajengipun pasamuan siang ing bèntèng Akerhus. Ing mriku Ngarsá Dalem ugi paring pidato.

Militèr

Wekdal siangipun ing kapal Zr.Ms. Rotterdam, ingkang nembé ndèrèk latihan perang ing wilayah laut Norwegia, wonten rembagan militèr antawis Walandi-Norwegia. 

Rembagan wau antawisipun ngrembag latihan militèr tahunan ing gunung sáhá wanci winter ing wilayah lèr Norwegia ingkang sampun mlampah 50 tahun.

Dalunipun Ngarsá Dalem Willem-Alexander tuwin Gusti Kanjeng Ratu Máxima gantosan ngaturaken konsèr célo saking Harriët Krijgh ing gedhong muséum MUNCH.

Dinten Kemis suryá kaping 11 ing kuthá Trondheim tuwi kanegaran nggatosaken pangreksan segárá ingkang lestari sáhá pangalihan nuju sumber ènèrgi lestari. 

Ngarsá Dalem antawisipun tuwi laboratorium Norwegian Centre for Plankton Technology sáhá Powerhouse Brattørkaia, satunggaling gedhong ènèrgi-plus saking tenágá suryá.

Salajengipun mirsani piranti panelitèn ing Maritime Robotics, antawisipun drone maritim, ugi ngendikan kaliyan mahasiswa Norwegian University of Science and Technology. 

Ing mriki Holland Circular Hotspot lan Nordic Circular Hotspot téken prajanjéan kamitran. Siangipun wonten pasamuan sareng walikuthá Trondheim ing Stiftsgǻrden.