AMSTERDAM – Ngunjuk kopi saben dinten gesang langkung dangu, kopi biasa utawi kopi bébas kafèin sami mawon.
Makaten tim riset Eropa sareng Amérika ingkang sampun ngumumaken kasil risetipun ing jurnal Annals of Internal Medicine dinten Selásá (15/8/2017).
Kanggé riset puniká tim ilmuwan dangunipun 16 taun neliti 521.330 rèsponden saking bènten-bènten negari Eropa. Tim ugi neliti rahipun 14.000 rèsponden lan antawisipun manggihi bilih kelompok ingkang ngunjuk kopi nggadhahi lever langkung séhat.
Kejawi makaten kelompok wau ugi langkung sekedhik zat-zat ingkang saget ndadosaken penyakit, ugi langkung sensitif tumrap insulin. Èfèk nglindungi saking kopi presisipun pripun puniká dèrèng cethá.
Ewodènten kanggé riset Amérika tim ilmuwan saking 2 universitas dangunipun 20 taun neliti data 185.000 tiyang Amérika, anwatisipun dipunteliti konsumsi kopi párá rèsponden wau, gadhah penyakit punápá, lan pungkasanipun sédá amargi punápá.
Data-data wau lajeng dipungandhèngaken. Tim riset nyimpulaken bilih tiyang-tiyang ingkang ngunjuk kopi kirang nggadhahi gangguan padharan, langkung sekedhik kamungkinan pikantuk penyakit jantung lan pembuluh darah, diabetes, kanker, lan penyakit ginjal.
Guru Besar Pangan, Penyakit Jantung lan Pembuluh Darah Wageningen Universiteit Prof. Dr. J.M. Geleijnse maringi seratan babagan riset puniká.
Miturut Geleijnse, adedasar biologi tiyang-tiyang ingkang boten remen kopi bènten kaliyan tiyang ingkang remen kopi utawi metabolismenipun bènten, saénggá pikantuk èfèk sisihan saking kopi. Kadosipun profil DNA lan metabolisme wau wonten gegayutanipun kaliyan risiko sédá.
“Sinten kathah ngunjuk kopi lajeng boten ngunjuk sanèsipun, kados unjukan ingkang manis-manis lan boten séhat. Antawisipun makaten ingkang ndadosaken kelompok puniká saget gesang langkung dangu,” makaten Geleijnse.
Sangsáyá Awis
Sarèhning panèn kopi boten nyekapi, lajeng wonten masalah ènèrgi lan transportasi milá regi kopi sangsáyá awis. Dugi Desèmber 2021 regi kopi Arabica mindhak ngantos 85% taun puniká, mindhak paling kathah wiwit 1999.
Dipunprakiraaken regi wiji kopi ing wekdal-wekdal ngajeng bakal tansah mindhak, makaten Koffiemax.
Panèn kopi ing Brazil, pangasil kopi paling kathah sakdonyá, taun puniká anjlok 23% sarèhning owahipun iklim. Ing Colombia, kisruh protès kalawan pamréntah ngadhang-ngadhangi ékspor kopi. Paguyuban kopi nasional Colombia mprakiraaken wonten 500.000 karung kopi boten saget dipunékspor.
Sedáyá puniká sareng kaliyan gagal panèn ndadosaken catu kopi sajagad anjlok, sawetawis panyuwun kopi malah mindhak. Ugi ing negari-negari pangasil kopi sanèsipun sampun pinten-pinten taun panènipun boten saé.