DEN HAAG – Pulisi rátá-rátá maringi dendhá kaping 850 per minggu tumrap párá wargi ingkang nyepéda sambi dolanan ponsel utawi hp.
Makaten data Centraal Justitieel Incassobureau (CJIB) ingkang dipunbabaraken déning nu.nl kapethik Het Javaanse Blad dinten Jemuah wanci énjing (8/10).
Nitih sepéda sambil dolanan ponsèl utawi nélpon ing Walandi resmi verboden (dilarang) wiwit sasi Juli 2019 lan dendhanipun 95 Euro, wekdal sapuniká mindhak dados 100 Euro utawi Rp 1.650.000 (kurs €1 = Rp 16.500).
Miturut panelitian, tiyang nitih sepéda mbebayani sanget menawi piyambakipun nyambi dolanan ponsèl. Tuladhanipun menawi nyambi WhatsApp mesthi megal-megol boten lempeng lan mboten ningali kiwá tengen utawi sakelilingipun amargi migatosaken WhatsApp ing ponsèlipun.
Data saking kalih taun kapungkur nedhahaken bilih dendhá ing wanci bentèr 1/3 langkung kathah tinimbang wanci adhem (winter). Jalaranipun nyepéda sambi nyepengi ponsèl wanci adhem mboten sekécá atis anyes, ugi saget teles kénging jawoh, polsèl saget risak. Ugi kangèlan nunyul-nunyul layar ponsèl menawi ngagem sarung astá.
“Logis, tinemu nalar. Menawi atis tur asring jawoh saget kulá bayangaken menawi tiyang nyepéda mboten nyepengi ponsèlipun,” ngendiká Agnieszka Stelling saking SWOV, spesialis tingkah polah tiyang nyepéda, kapethik saking nu.nl dinten Jemuah (8/10).
Ingkang wigatos miturut Stelling inggih puniká dugi sepinten tiyang-tiyang wau ngraosaken hukuman.
“Menawi tiyang-tiyang wau menggalih bilih pulisi mboten bakal nyepeng, pramilá larangan miturut hukum wau dados kirang ndhayagunani,” makaten Stelling.