AMSTERDAM – Omikron dados varian virus Corona paling kathah ing kuthá Amsterdam. Saking 106 tès positif, 63 utawi 59% péranganipun Omikron, varian ingkang paling nular.
“Saking tès paling énggal GGD lan Amsterdam UMC dinten Selásá cacahipun wonten 63 saking 106 sampel tès positif utawi 59% jebul varian Omikron,” makaten data saking Amsterdam Regional Genomic epidemiology and Outbreak Surveillance (ARGOS) ingkang kababar ing Twitter (21/12/2021).
Juruwicárá Amsterdam UMC (Amsterdam Universitair Medische Centra) mangsuli dateng serat kabar Het Parool bilih data wau pancèn leres makaten.
Het Rijksinstituut voor Volksgezondheid en Milieu/RIVM (Institut Nasional kanggé Keséhatan lan Lingkungan) mprakiraaken bilih varian Omikron ugi bakal nyebar kanthi cepet lan dominan dateng wilayah sanèsipun ing tanah Walandi. Miturut RIVM puniká badhé kadadosan antawis dinten Natal dugi Taun Énggal.
Virus Corona varian Omikron puniká langkung nular tinimbang varian Délta ingkang pinten-pinten sadèrèngipun sampun dados varian ingkang paling kathah nyebar ing Walandi.
Miturut kasil panelitèn sawetawis antawisipun saking Inggris lan Afrika Kidul, Omikron puniká kadosipun boten pati nyebabaken gerah nemen tinimbang varian Délta. Senaosá makaten menawi kathah tiyang ingkang katularan ing wekdal ingkang sami pramilá saget andadosaken kathah opname ing griyá sakit, makaten párá paneliti sampun wanti-wanti.
Pamréntah kutháprájá Amsterdam dinten Selásá sampun andum 100.000 ingkang kasebat ‘bezoekpakketten’ (pakèt mertamu, red) kanggé párá kawulá Amsterdam ingkang mbetahaken sáhá kanggé bagéan wilayah kuthá ingkang jumlah wargi karsá vaksinasi paling sakedhik.
Pakèt wau isinipun piranti tès mandiri, masker, lan katerangan pripun caranipun nindakaken pranatan dhasar ing griyá babagan Corona. Pakèt dipunaturaken dateng griyá párá kawulá, dipunandumaken ing peken, sáhá saget dipunpundhut piyambak ing panggénan Huizen van de Wijk antawis dinten Natal dugi Tahun Énggal.
Mawi pakèt wau pamréntah kutháprájá ngarsaaken párá wargi kanthi temen netepi pranatan dhasar ing griyá lan saputeranipun, utaminipun migatosaken pranatan nampi tamu.
Walikuthá Amsterdam Ibu Femke Halsema dhawuh bilih piyambakipun saget mangertosi raosipun párá wargi ngadhepi piwatesan-piwatesan.
“Panci nguciwani bilih kitá ing wekdal puniká kedah kathah ing griyá sáhá matesi tamu kitá. Padhahal salebeting dinten riyáyá puniká kitá remen kepanggih lan kempal. Nanging sedáyá wau kanggé kawigatosan langkung ageng inggih puniká nanggulangi panyebaran Omikron. Monggo sami ngatos-atos ugi netepi pranatan Corona. Kanthi makaten kitá saget ngreksá sareng-sareng, utaminipun párá tiyang sepuh lan éyang kitá ingkang ringkih,” makaten Walikuthá Halsema.