PEKALONGAN – Naamlooze Vennootschap Cultuurmaatschappij Kalimati (PT Pakebonan Kalimati), pabrik gendhis, sapuniká RSUD Kalisari. Mbah Buyut dugi taun 1980-an abad kapengker taksih ketentá nyebat “pabrik”, “Sawahan puniká caket pabrik.”
Minongká lampiran tambahan Staatsblad 1858 nomer 17 taun 1892 dipunwedalaken statuta Naamlooze Vennootschap Cultuurmaatschappij Kalimati (PT Pakebonan Kalimati, red), ingkang tujunipun nggarap pakebonan tebu kanggé pabrik gendhis Kalimati, sapuniká RSUD Kalisari, kalenggahan ing kabupaten Batang, karesidènan Pekalongan, makaten dipunpethik saking Java-bode, dinten Setu (13/2/1892)
Panèn taun 1892 mlampah sedayanipun kanggé bathi lan ruginipun perusahaan, sedáyá biaya ingkang dipun wedalaken sadèrèngipun pendamelan perusahaan, sadèrèngipun panèn taun 1892, sáhá taun-taun salajengipun, komplit kalih rènte lan komisi dados tanggunganipun perusahaan.
Het maatschappelijk kapitaal (modhal dhasar, red) PT Pakebonan Kalimati puniká jumlahipun 640.000 gulden, dipunbagi dados 128 andil, dados saben-saben andil reginipun 5.000 gulden, ingkang sampun dipunsetujui. Sedáyá andil wau sampun dipunsetoraken nganggé nami miturut kersanipun sedáyá ingkang ndèrèk.
Kanggé kaping sepindhah, dangunipun dugi gangsal taun, dipundhapuk direksi Factorij der Nederiandsche Handelmaatschappij ing Batavia, ingkang badhé ngurus tanpá biaya.
Rapat umum pangastá andil ingkang netepaken punápá badhé dipundamel bandhá cadhangan kanggé njagani kerugian sáhá bándhá pangénggalan, dugi pinten kathahipun badhé dipuntambahi, sartá jumlah ingkang badhé dipunsisihaken saking bebathèn kanggé setor lan mantepaken modhal.
Kejawi puniká bebathèn taunan, sasampunipun dipun kirangi bonus lan dipunsetujui déning rapat umum, saget dipunandumaken dumateng párá pangastá andil. Menawi miturut étangan bathi lan rugi kasunyatanipun rugi lan puniká boten saget dipuntutup saking bándhá cadhangan, pramilá dipunbetá ing debet étangan bathi lan rugi taun ngajengipun. (es)