DEN HAAG – Pajek gendhis bakal kawiwitan mangké dinten 1 Januari 2024. Cola, sari woh-wohan, jajanan, bir tanpá alkohol lan unjukan sanèsipun ingkang manis bakal tambah awis.
80% panganan ing supermarkèt boten séhat
AVGG (Alliantie Voeding voor de Gezonde Generatie)
Jalaranipun wonten suikertaks, inggih puniká pajek tambahan tumrap produk-produk sarwá manis, kanggé nanggulangi obésitas sáhá resiko kaséhatan kasebab gendhis.
Pamaréntah menggalih bilih menawi regi produk-produk ingkang kathah ngandhut gendhis sangsáyá awis mawi pajek tambahan, konsumsi bakal mandhap, bakal kirang.
Cekak aosipun mawi pajek puniká konsumsi produk-produk makaten saget dirèm. Puniká wigatos sanget sarèhning obésitas dados masalah ageng ing Walandi.
Senaosá makaten pabrikan ingkang boten karsá kénging tambahan pajek saget ngirangi kadar gendhisipun. Makaten párá kawula dituntun gesang langkung séhat.
Miturut pétangan Rijksinstituut voor Volksgezondheid en Milieu (RIVM) pajek puniká bakal ngirangi omzet unjukan manis ngantos 384 juta liter utawi 15% dugi 18% per tahun.
Pajek gendhis ing tanah Walandi utaminipun ditrapaken tumrap jajanan lan unjukan manis, antawisipun bir tanpá alkohol lan softdrink, ugi versi light lan zero.
Pajek puniká nyebabaken regi sedáyá unjukan manis bakal mindhak rátá-rátá 7% à 8% sèn per klenthung, utawi mindhak kirang langkung 10%.
Sangsáyá kathah volume softdrink, sangsáyá awis reginipun, kadostá sagendul Cola 1,5 liter panjenengan mbayar langkung awis tinimbang saklenthung 0,33 liter.
Kosok wangsulipun pajek toyá mineral dibusek. Puniká ‘jangkah wiwitan ingkang saé’, nanging taksih dibetahaken langkung kathah malih kanggé nanggulangi obésitas.