PEKALONGAN – Ing wekdal pungkasan taun 1935 dumateng De Volksraad dipunaturaken 3 rancangan ordonansi babagan pambibaran Kabupatèn Karanganyar, Kabupatèn Batang sáhá Kabupatèn Purwokerto.
Salajengipun miturut rancangan ordonansi wau Karanganyar mlebet Kebumèn, Batang dipungabungaken kalih Pekalongan, éwodènten Purwokerto dados satunggal kalih Banyumas, makaten Algemeen Handelsblad voor Nederlandsch-Indië, dinten Setu (09/11/1935).
Wonten ing memorie van toelichting (Risalah Katerangan) rancangan ordonansi wau kaserat antawisipun makaten:
Kabupatèn Karanganyar nggadhahi wilayah wiyaripun 792 km2 lan cacahipun wargi kirang langkung wonten 407.000. Kabupatèn Kebumèn wiyaripun 554 km2, warginipun 333.200. Sasampunipun dipungabungaken wiyaripun kabupatèn énggal puniká dados 1.345 km2, lajeng warginipun 740.200.
Éwodènten kabupatèn Batang lan Pekalongan wiyaripun 859 km2 lan 932 km2, lajeng warginipun 298.590 lan 485.900. Sasampunipun dipungabungaken wiyaripun dados 1.791 km2 lan total cacahipun wargi 784.400. Panggabungan Batang kalih Pekalongan puniká dadosaken kabupatèn paling ageng ing Jawi Tengah, senaosá makaten boten bakal wonten masalah pamréntahan utawi masalah politik.
Salajengipun leburipun kabupatèn Purwokerto gabung dados satunggal kalih kabupatèn Banyumas pancèn sampun dipunprakiraaken bakal ngadhepi masalah praktis. Caranipun ngatasi sampun dipunsiyapaken inggih puniká kanthi mecah distrik Purworejo saking wilayah kabupatèn Purwokerto, lajeng nambahaken mlebet kabupatèn Banjarnegara.
Saking paningalan etnografis distrik kaserat wau langkung cocok menawi mlebet Banjarnegara. Wiyaripun wilayah kabupatèn Purwokerto, Banyumas, lan Banjarnegara inggih puniká urut-urutan 931 km2, 541 km2, 693 km2, lan warginipun 396.700, 394.400 lan 286.600. Sasampunipun dipungabungaken kabupatèn Banyumas wiyaripun dados 1.300 km2, warginipun 684.100, éwodènten Banjarnegara dados 866 km2 lan warginipun 393.600.
Saking panggabungan kabupatèn Banyumas kalih Purwokerto, ibukuthanipun boten badhé ing Banyumas, nanging kedah ing Purwokerto. Pancèn wonten pinten-pinten anggota déwan kabupatèn Banyumas ingkang boten saget nampi, nanging sedáyá wau boten cekap kanggé tetep nyepengi Banyumas minongká ibukuthá pamréntahan sáhá kalenggahan dalem resmi bupati, punápá malih sedáyá dinas sampun pindhah nilaraken kuthá Banyumas.