WAGENINGEN – Ing Tweede Kamer, Den Haag, dipunawontenaken Pamèran Foto Jaman Perang. Pangarsá Tweede Kamer Khadija Arib, sadèrèngipun purná tugas, sareng-sareng kaliyan diwan juri mirsani foto-foto wau ing Hotel de Wereld ing Wageningen.
Foto-foto puniká minongká bagéan saking paméran De Tweede Wereldoorlog in Honderd Foto’s, ingkang saget dipunpirsani wiwit tanggal 30 Maret ing de Tweede Kamer. Foto-foto wau, 25 lembar per provinsi, kapendhet saking párá fotograf profesional, nanging ugi saking kagunganipun partikelir.
Sasi Nopember kapengker dipunwiwiti madosi: saben provinsi párá wargi dipunsuwun ndhèrèk menggalih babagan foto ingkang nggambaraken sejarah perang. Naliká kempalan ing provinsi tanggal 15 Januari, dipunaturaken 50 foto. Wargi ingkang rawuh ndhèrèk milih foto kanggé tingkat nasional.
“Mungguhipun kulá puniká kinormatan saget dados pangarsá juri ugi kempalan kriyá ing mriki. Sanget mbingahaken saget rembugan sareng-sareng babagan foto wau. Kadhang kálá gambar saget ngendikan langkung kathah tinimbang ukárá. Ing saben-saben foto ngandhut cariyos piyambak. Kempalan dinten sapuniká ngaturi guneman ingkang rumesep,”
Paméran foto lan pamilihan déning párá wargi minongká prèngetan 75 taun kamardikan Walandi taun 2021 puniká. Gagasanipun nggih puniká utaminipun gambar-gambar ingkang ngaturaken kanthi cethá jaman kapengker, ngèngeti jaman perang wau sangsáyá tebih saking penggalih kitá.
Madosi foto-foto wau ngasilaken material ingkang sampun misuwur lan ingkang dèrèng, antawisipun foto-foto saking Nederlands-Indië (Indonesia), Suriname lan Antillen. Wargi ndhèrèk nyumbang kanthi ngintun atusan foto. Juri, kanthi pangarsá Tweede Kamer Khadija Arib, netepaken kathahipun 100 foto kanggé paméran.
“Ugi ing Tweede Kamer kitá nggatosaken 75 taun kamardikan. Gagasan puniká mathuk kaliyan prèngetan wau. Foto-foto puniká ndamel cethá bilih kitá, 75 taun majeng, taksih dèrèng pirsá sedáyá. Saben-saben foto ngandhut cariyos, ngandhut babad kaluargi piyambak. Mbingahaken sanget bilih sedáyá cariyos wau, pripun angèlipun ugi, saget dipunaturaken dumateng generasi salajengipun.
“Kulá bingah sanget bilih foto-foto puniká wiwit tanggal 30 Maret saget dipunpirsani ing Tweede Kamer, jantungipun demokrasi Walandi lan masyarakat mardhiká,” makaten pangarsá Tweede Kamer Khadija Arib.